Nabuntog ang Iyang Pagkamaduhaduhaon
Sa dihang ang usa ka batan-ong lalaki sa isla sa Caribeano sa Jamaica nahimamat sa mga Saksi ni Jehova, siya maduhaduhaon kaayo bahin sa paglungtad sa Diyos ug nanghimakak sa pagkadinasig sa Bibliya. Bisan pa niana, siya mapanagan-ong midawat ug usa ka kopya sa librong Ang Bibliya—Pulong sa Diyos o sa Tawo? Ang mga pagbalikduaw gihimo ngadto kaniya, apan sa kataposan iyang giingnan ang mga Saksi nga dili mobalik hangtod nga iyang dapiton sila.
“Mga bulan sa ulahi,” nagtaho ang mga Saksi, “mitelepono siya ug misuknag daghang pangutana. Apan hinawayon gihapon siya sa mga tubag sa Bibliya.”
Ngadtongadto, usa ka kopya sa librong Kahibalo nga Motultol sa Kinabuhing Walay Kataposan ang gibilin ngadto sa batan-ong lalaki, ug usa ka regular nga pagtuon sa Bibliya nasugdan uban kaniya. Wala madugay human niana, siya mikomento: “Karon akong nasabtan kon nganong ang pagtuon nga sama niini kinahanglanon.” Nalipay kaayo siya bahin sa iyang nakat-onan nga siya mihangyo nga magtuon kaduha sa usa ka semana. Sa wala madugay siya misugod sa pagtambong sa Kristohanong mga tigom nga makanunayon.
Ang pagtuo sa milyonmilyon napalig-on sa pagbasa sa Ang Bibliya—Pulong sa Diyos o sa Tawo? ug sa pagtuon sa libro nga Kahibalo nga Motultol sa Kinabuhing Walay Kataposan. Kon buot kang makabaton ug kopya niining mga libroha o buot nga may usang magdumalag pagtuon sa Bibliya sa balay uban kanimo, palihog pagsulat sa Watch Tower, P.O. Box 2044, 1060 Manila, o sa nahiangayng adres nga gilista sa panid 5.
[Picture Credit Line sa panid 32]
Hapin sa libro nga Ang Bibliya—Pulong sa Diyos o sa Tawo?: Ikatulong-siglo nga papiro ug Hebreohanong linukot nga basahon sa Ester: The Trustees of the Chester Beatty Library, Dublin; busto ni Alejandro nga Bantogan: Musei Capitolini, Roma