“Butang nga Talagsaon”

Human mabasa ang librong Ang Labing Bantogang Tawo nga Nabuhi Sukad, usa ka libro nga naningkamot sa pagpresentar sa matag hitabo sa yutan-ong kinabuhi ni Jesus nga giasoy diha sa upat ka Ebanghelyo, ang 70-anyos nga babaye sa Moscow, Rusya, mipatugbaw: “Wala pa akoy nabasa sukad nga sama niana nga literatura. Buot kong mahibalo ug dugang mahitungod sa Diyos ug kang Jesu-Kristo ug bisan sa pagtuon sa Bibliya.”

Ang sangang buhatan sa mga Saksi ni Jehova sa Rusya sagad nga makadawat ug ingon niana nga mga sulat mahitungod sa literatura sa Bibliya. Ang susamang sulat gipadala sa usa ka babaye sa Chelyabinsk, usa ka siyudad nga adunay kapin sa usa ka milyong tawo nga halos 1,500 ka kilometros habagatan-kasadpan sa Moscow.

Siya miingon bahin sa Ang Labing Bantogang Tawo nga Nabuhi Sukad: “Ang libro maoy butang nga talagsaon. Kini nagtisok diha sa mga tawo ug paglaom alang sa malipayong umalabot ug nagtabang kanila sa pagkahibalo bahin sa karaang kasaysayan. Sa wala ko pa mabasa kining libroha, wala gayod ako maghunahuna mahitungod sa Diyos ug wala gayod akoy interes sa relihiyon, apan karon buot kong magpabawtismo. Buot ko gayod nga magtuon sa inyong libro. Buot kong sultihan ang akong mga higala, mga kaila, mga paryente mahitungod sa mga butang nga akong nabasa.”

Ikaw usab makadawat ug literatura nga makatabang kanimo sa pagkat-on ug dugang mahitungod kang Jesus ug sa binase-sa-Bibliya nga paglaom sa kinabuhi diha sa usa ka bag-ong kalibotan. Kon buot nimong makadawat ug kopya sa librong Ang Labing Bantogang Tawo nga Nabuhi Sukad o buot nga adunay usa nga moduaw sa imong balay sa pagdumalag usa ka libreng pagtuon sa Bibliya uban nimo, palihog pagsulat sa Watch Tower, P.O. Box 2044, 1060 Manila, o sa nahiangayng direksiyon nga nalista sa panid 5.