Mga Kombensiyon​—Sumala sa Bibliya

Usa ka panagtigom o panagtipon sa katawhan alang sa usa ka espesipikong katuyoan; usa ka asembliya. Sa Kasulatan ang pulong “kombensiyon” maoy usa ka hubad sa Hebreohanong pulong miq·raʼʹ, nga nagkahulogang “pagtawag sa tingob,” o “panagtigom; panawag.” Ang laing hubad niining Hebreohanong pulong maoy “panawagan.” Nagpamatuod sa paninugdang kahulogan niini mao ang pagkagamit niini diha sa Numeros 10:2 nga nagpalugdang sa ideya bahin sa panagtigom sa katilingban sa Israel.

Ang “balaang mga kombensiyon” gitakda ingon sa mosunod: (1) Matag Igpapahulay (Levitico 23:3); (2) ang una ug ikapitong adlaw sa Pista sa Tinapay nga Walay Igpapatubo panahon sa Nisan, ang unang bulan (Marso-Abril) (Numeros 28:​18, 25; Levitico 23:6-8); (3) ang Pista sa mga Semana o Pista sa Pagpangani, nga nailhan sa ulahi ingong Pentekostes, nga gisaulog sa ikatulong bulan, Sivan (Mayo-Hunyo) (Levitico 23:15-21); (4) ang una ug ang ikanapulong adlaw sa ikapitong bulan, Ethanim o Tishri (Septiyembre-Oktubre), ang adlaw nga naulahi maoy Adlaw sa Pagtabon-sa-sala (Levitico 23:23-27; Numeros 29:​1, 7); (5) ang unang adlaw sa Pista sa mga Balongbalong, nga magsugod sa ika-15 nga adlaw sa ikapitong bulan, Ethanim o Tishri, maingon man usab ang adlaw pagkatapos nianang pito-ka-adlaw nga pista.​—Levitico 23:33-36.

Ang usa ka talagsaong bahin sa tanan niining “balaang mga kombensiyon” mao nga sa maong panahon walay mahago nga buluhaton nga buhaton ang katawhan. Pananglitan, ang una ug ang ikapitong adlaw sa Pista sa Tinapay nga Walay Igpapatubo maoy “balaang mga kombensiyon,” nga bahin niini si Jehova miingon: “Walay trabaho nga buhaton nianang mga adlawa. Ang gikinahanglan lamang nga kan-on sa matag kalag, kana lamang ang mahimo ninyong buhaton.” (Exodo 12:​15, 16) Apan, sa “balaang mga kombensiyon” ang mga saserdote puliki sa pagtanyag ug mga halad kang Jehova (Levitico 23:​37, 38), nga dili gayod paglapas sa bisan unsang sugo sa pagbuhat sa naandang buluhaton sa matag adlaw. Hinuon, sa kinatibuk-an kining mga okasyona dili maoy mga panahon nga walay trabaho ang katawhan kondili mga panahon alang sa dakong kaayohan sa espirituwal. Sa senemanang adlaw nga Igpapahulay, ang katawhan managtigom alang sa publikong pagsimba ug pagtudlo. Sila nianang tungora mapalig-on pinaagi sa publikong pagbasa ug pagpatin-aw sa sinulat nga Pulong sa Diyos, sama sa mga sinagoga sa ulahi. (Buhat 15:21) Busa, bisan ang katawhan dili mohimog mahago nga buluhaton panahon sa adlaw nga Igpapahulay o sa ubang “balaang mga kombensiyon,” sila nianang panahona magdeboto sa pag-ampo ug sa pagpamalandong bahin sa Maglalalang ug sa iyang mga katuyoan.