Gikan sa Among mga Magbabasa
Nagkadaiyang Matang sa Kinabuhi Diha sa Upper Amazon (Abril 2010) Ang inyong artikulo nag-ingon nga ang mga tawong Awajun (Aguaruna) nagsimbag lima ka diyos. Ingong sakop sa tribong Awajun, dili ko uyon niana. Para nako nasayop mo, kay kadaghanan sa mga Awajun nag-angkong Kristohanon ug wala kami magsimbag lima ka diyos, ingon sa gisulti sa inyong magasin. Sanglit ang mga Awajun tigbasahan sa inyong magasin, palihog tul-ira kining maong sayop.
T.P.T., Peru
Ang “Pagmata!” nagtubag: Ang magsusulat nagkuhag impormasyon gikan sa lainlaing tinubdan, nga naglakip sa personal nga pag-interbiyo sa kanhing mga molupyo sa Aguaruna nga mga komunidad ug sa daghang publikasyon. Usa niini, ang “Atlas Regional del Perú,” 2004 Edition, nagngalan ug naghubit sa lima ka diyos sa mga Aguaruna. Apan sumala sa imong giingon, ang mga molupyo sa pipila ka Aguaruna nga komunidad nag-angkon nang Kristohanon. Gikasubo namo kon nakahatag kamig sayop nga impresyon.
Kon Unsay Angayng Himoon Niadtong Nganga Mosulti (Mayo 2010) Salamat niining artikuloha. Nganga sab ko, ug sagad maguol ko tungod niini. Apan human nako mabasa kining artikuloha, nakaamgo ko nga wala diay ko mag-inusara. Karon, dili na ko motugot nga maapektohan niini ang akong kinabuhi ug, sama kang Rafael, “kon magnganga ko, ako ra kining kataw-an.”
Y. S., Japan
Mga Batan-on Nangutana . . . Sa Unsang Paagi Mapauswag ang Akong Kompiyansa sa Kaugalingon? (Mayo 2010) Ako 12 anyos ug nagpuyo uban sa akong inahan, kinsa masakiton kaayo ug nag-inusara sa pagpadako kanako. Sa dihang akong gibasa ang pangutana nga “Mobati ka ba nga dunay nagmahal kanimo?” sa tinuoray lang mitubag kog “Wala.” Naguol ko niana. Busa nakigsulti ko sa pipila ka hamtong nga mga Kristohanon ug sa akong inahan bahin niini. Sa tabang niining artikuloha akong nasabtan nga walay katarongan nga maghunahunag negatibo bahin sa akong kaugalingon. Daghan ang nagmahal nako. Salamat sa pagtabang nako nga masabtan nga si Jehova nagtagad gayod kanamong mga batan-on.
C. H., France
Nadasig ko niining artikuloha sa pagsagubang sa mapait nga mga kasinatian ug sa pagbating walay pulos nga usahay maghasol gihapon nako. Dili gyod ko malimot sa tulo ka sugyot diin mapauswag nako ang akong kompiyansa sa kaugalingon, ilabina ang ilustrasyon bahin sa kuwartang papel nga dunay gamayng gisi! Salamat niining nindot kaayong artikulo!
S. W., South Korea