Si Abraham—Higala sa Diyos

USA sa mga dapit diin ang katawhan miadto sa pagpuyo human sa Lunop gitawag Ur. Nahimo kining usa ka hinungdanong siyudad, apan ang katawhan didto nagsimba sa bakak nga mga diyos. Dili sila sama kang Noe ug sa iyang anak si Sem, kinsa pabiling nag-alagad kang Jehova.

Sa kataposan, 350 ka tuig human sa lunop, ang matinumanong Noe namatay. Duha ka tuig lang sa ulahi ang tawo nga makita mo dinhi sa hulagway natawo. Siya maoy espesyal kaayo nga tawo alang sa Diyos. Ang iyang ngalan maoy Abraham, ug siya nagpuyo uban sa iyang pamilya diha nianang siyudad sa Ur.

Usa ka adlaw si Jehova nagsulti kang Abraham: ‘Bumiya ka sa Ur ug sa imong mga paryente, ug umadto sa usa ka nasod nga akong ipakita kanimo.’ Misugot ba si Abraham sa Diyos? Oo, siya misugot. Si Abraham kanunayng nagsugot sa Diyos. Kanay hinungdan nga siya nailhan ingon nga higala sa Diyos.

Ang amahan ni Abraham nga si Tare miuban kaniya sa dihang siya mibiya sa Ur. Mikuyog usab ang iyang pag-umangkon nga si Lot, ug, dayag na lang, ang iyang asawa nga si Sara. Unya, silang tanan nahiabot sa usa ka dapit gitawag Haran, diin si Tare namatay.

Sa wala madugay, si Abraham ug ang iyang panimalay mibiya sa Haran ug mibalhin ngadto sa yuta nga gitawag Canaan. Didto si Jehova miingon: ‘Kini ang yuta nga akong ihatag sa imong kaanakan.’

Ang Diyos misugod sa pagtabang kang Abraham mao nga nakabaton siyag dakong mga panon sa karnero ug ginatos ka ulipon. Apan siya ug si Sara wala makabaton ug mga anak.

Sa dihang si Abraham 99 anyos ang panuigon, miingon si Jehova: ‘Ako nagasaad nga ikaw mahimong amahan sa daghang mga nasod sa katawhan.’ Apan sa unsang paagi kini mahitabo, sanglit si Abraham ug si Sara maoy tigulang na kaayo karon sa pagpanganak?