Kapitulo 54
“Ang Tinuod nga Tinapay Gikan sa Langit”
ANG adlaw nga miagi halandumon gayod. Si Jesus milagrosong nagpakaon sa libolibo ug dayon miikyas gikan sa tinguha sa mga tawo nga himoon siyang hari. Niadtong gabhiona iyang gilakaw ang gibagyong Dagat sa Galilea; giluwas si Pedro, kinsa misugod pagkalunod sa milakaw siya ibabaw sa gikusokuso-sa-bagyong katubigan; ug gipalinaw ang mga balod aron luwason ang iyang mga tinun-an gikan sa pagkalunod.
Karon ang mga tawo nga milagrosong gipakaon ni Jesus sa amihanan-silangan sa Dagat sa Galilea nakakita kaniya duol sa Capernaum ug nangutana: “Kanus-a ka pa man miabot dinhi?” Gibadlong sila, si Jesus miingon nga sila nangita lamang kaniya tungod kay ilang gilaoman ang laing walay-bayad nga pagkaon. Iyang giawhag sila sa pagbuhat, dili alang sa pagkaon nga mahanaw, kondili alang sa pagkaon nga magapabilin alang sa kinabuhing walay kataposan. Busa ang mga tawo nangutana: “Unsay among buhaton sa pagbuhat sa mga buluhaton sa Diyos?”
Ginganlan ni Jesus ang usa ka buluhaton nga labing bililhon. “Kini mao ang buluhaton sa Diyos,” siya mipatin-aw, “nga kamo motuo kaniya nga Iyang gipadala.”
Ugaling, ang mga tawo wala motuo kang Jesus, bisan pa sa tanang milagro nga iyang gibuhat. Dili-katuohan, bisan pa sa tanang katingalahang mga butang nga iyang nahimo, sila nangutana: “Nan, unsa ba ang imong ginabuhat ingon nga ilhanan, aron kami makakita niana ug motuo kanimo? Unsang buluhatona ang imong ginabuhat? Ang among mga amahan nagkaon sa manna sa kamingawan, sumala sa nahisulat, ‘Siya mihatag kanilag tinapay gikan sa langit aron pagakan-on.’”
Ingong tubag sa ilang gipangayong usa ka ilhanan, si Jesus nagpatin-aw sa Tinubdan sa milagrosong mga pagkaon, nga miingon: “Si Moises wala maghatag kaninyo sa tinapay gikan sa langit, kondili ang akong Amahan nagahatag kaninyo sa tinuod nga tinapay gikan sa langit. Kay ang tinapay sa Diyos mao ang usa nga nanaog gikan sa langit ug nagahatag ug kinabuhi sa kalibotan.”
“Ginoo,” ang mga tawo miingon, “hatagi kami sa kanunay niining tinapaya.”
“Ako mao ang tinapay sa kinabuhi,” mipatin-aw si Jesus. “Siya nga moanhi kanako dili na gayod pagagutomon, ug siya nga motuo kanako dili na gayod pagauhawon. Apan ako nagaingon kaninyo, Kamo nakakita pa kanako ug bisan pa niana kamo dili motuo. Ang tanang butang ginahatag kanako sa Amahan moanhi kanako, ug ang moanhi kanako dili gayod nako papahawaon; tungod kay ako nanaog gikan sa langit sa pagbuhat, dili sa akong kabubut-on, kondili sa kabubut-on sa nagpadala kanako. Kini ang kabubut-on sa nagpadala kanako, nga walay mawala sa tanan nga iyang gihatag kanako kondili nga akong pagabanhawon kini sa kataposang adlaw. Kay kini mao ang kabubut-on sa akong Amahan, nga ang tanan nga makakita sa Anak ug motuo kaniya magabaton ug kinabuhing walay kataposan.”
Niana ang mga Hudiyo misugod sa pagbagulbol kang Jesus kay siya miingon, “Ako mao ang tinapay nga nanaog gikan sa langit.” Ang ila lamang nakita mao nga siya usa ka anak sa tawhanong mga ginikanan ug busa sa samang paagi nga mitutol ang katawhan sa Nazaret, sila mitutol, nga nagaingon: “Dili ba kini si Jesus ang anak ni Jose, kansang amahan ug inahan atong nailhan? Naunsa man nga karon siya nagaingon, ‘Ako nanaog gikan sa langit’?”
“Hunong na kamo sa pagbagulbol sa inyong kaugalingon,” si Jesus mitubag. “Walay tawo ang makaanhi kanako gawas ang Amahan, nga nagpadala kanako, magadani kaniya; ug siya akong pagabanhawon sa kataposang adlaw. Kini nahisulat diha sa mga Manalagna, ‘Ug silang tanan pagatudloan ni Jehova.’ Ang tanan nga nakadungog gikan sa Amahan ug nakakat-on moanhi kanako. Dili ingon nga may tawong nakakita sa Amahan, gawas kaniya nga nagagikan sa Diyos; kini siya nakakita sa Amahan. Sa pagkamatuod ako magaingon kaninyo, Siya nga nagatuo adunay kinabuhing walay kataposan.”
Sa pagpadayon, si Jesus nagsubli: “Ako mao ang tinapay sa kinabuhi. Ang inyong mga amahan mingkaon sa manna sa kamingawan ug bisan pa niana nangamatay. Kini ang tinapay nga nanaog gikan sa langit, mao nga si bisan kinsa mahimong makakaon niini ug dili mamatay. Ako mao ang buhing tinapay nga nanaog gikan sa langit; kon may mokaon niini nga tinapay siya mabuhi sa walay kataposan.” Oo, pinaagi sa pagtuo kang Jesus, ang usang gipadala sa Diyos, ang mga tawo makabatog kinabuhing walay kataposan. Walay manna, o laing tinapay, ang makahatag niana!
Ang paghisgot mahitungod sa tinapay gikan sa langit lagmit nagsugod tapos gayod sa pagkakaplag sa mga tawo kang Jesus duol sa Capernaum. Apan kana nagpadayon, nga miabot sa tayuktok sa ulahi samtang si Jesus nanudlo sulod sa usa ka sinagoga sa Capernaum. Juan 6:25-51, 59; Salmo 78:24; Isaias 54:13; Mateo 13:55-57.
▪ Unsang mga hitabo ang nag-una sa paghisgot ni Jesus sa tinapay gikan sa langit?
▪ Tungod sa bag-o pang nabuhat ni Jesus, nganong ang pagpangayog ilhanan dili gayod angay?
▪ Nganong ang mga Hudiyo nagbagulbol sa pangangkon ni Jesus nga siya mao ang tinuod nga tinapay gikan sa langit?
▪ Diin nahitabo ang paghisgot mahitungod sa tinapay gikan sa langit?