Kinsa ang mga Higala sa Diyos?

Si Jesu-Kristo maoy Anak ni Jehova ug ang iyang kinasuoran, gimahal pag-ayong higala. Sa wala pa siya magpuyo ingong tawo sa yuta, nagpuyo na si Jesus sa langit ingong gamhanang espiritung linalang. (Juan 17:5) Dayon mianhi siya sa yuta aron tudloan ang mga tawo sa kamatuoran bahin sa Diyos. (Juan 18:37) Gihatag usab niya ang iyang tawhanong kinabuhi aron luwason ang masinugtanong mga tawo gikan sa sala ug kamatayon. (Roma 6:23) Si Jesus karon ang Hari sa Gingharian sa Diyos, usa ka langitnong kagamhanan nga magpatunghag Paraiso niining yutaa.​—Pinadayag 19:16.

Ang mga manulonda maoy mga higala usab sa Diyos. Ang mga manulonda wala magsugod sa pagkinabuhi ingong mga tawo sa yuta. Gilalang sila sa langit sa wala pa buhata sa Diyos ang yuta. (Job 38:4-7) Dunay milyonmilyong manulonda. (Daniel 7:10) Kining langitnong mga higala sa Diyos buot nga ang mga tawo mahibalo sa kamatuoran bahin kang Jehova.​—Pinadayag 14:6, 7.

Ang Diyos adunay mga higala usab sa yuta; iyang gitawag sila nga iyang mga saksi. Ang usa ka saksi diha sa korte mopamatuod kon unsay iyang nahibaloan bahin sa usa ka tawo o butang. Ang mga Saksi ni Jehova nagpamatuod ngadto sa uban sa ilang nahibaloan bahin kang Jehova ug sa iyang katuyoan. (Isaias 43:10) Sama sa mga manulonda, buot sa mga Saksi nga tabangan kang mahibalo bahin kang Jehova. Buot sila nga ikaw mahimong higala usab sa Diyos.