YAWA
Kining ngalana gibansag kang Satanas tungod kay siya mao ang panguna ug kinalabwang tigbutangbutang ug bakak nga magsusumbong batok kang Jehova, sa iyang maayong pulong, ug sa iyang balaang ngalan. Ang Gregong pulong nga di·aʹbo·los nagkahulogang “tigbutangbutang.” (Itandi ang Luc 16:1, diin makita ang susamang berbo nga di·a·balʹlo.)—Tan-awa ang SATANAS.
Latas sa kasiglohan gipasundayag sa Yawa nga siya mao ang pangunang magsusupak sa Diyos ug sa tawo. Siya nakiglalis kang Miguel bahin sa lawas ni Moises (Jud 9); nagpakita nga siya adunay gahom sa paglit-ag sa uban (1Ti 3:7; 2Ti 2:26); naggamit sa mga tawo sama sa bakak nga relihiyosong mga pangulo, kang Judas Iskariote, ug kang Bar-Jesus ingong iyang mga anak (Ju 8:44; 13:2; Buh 13:6, 10); nagsakit sa mga tawo sa paaging dili arang matambalan sa mga mananambal (Buh 10:38); nagbalhog sa mga tawong matarong ngadto sa bilanggoan (Pin 2:10); ug gani may katakos sa pagpahinabo ug ahat nga kamatayon (Heb 2:14). Busa, ang mga Kristohanon gitambagan nga dili hatagan ug luna kining Tigbutangbutang sa Diyos pinaagi sa pagpabiling masuk-anon. (Efe 4:27) “Hupti ninyo ang maayong panghunahuna, magmabinantayon,” nagpasidaan si Pedro. “Ang inyong kaaway, ang Yawa, nagasuroysuroy sama sa usa ka leyon nga nagangulob, nga nagapangitag matukob.”—1Pe 5:8.
Adunay ubang mga higayon diha sa orihinal nga teksto sa Kristohanon Gregong Kasulatan diin makita ang pulong nga di·aʹbo·los apan wala magtumong kang Satanas, busa ang pulong tukmang gihubad nga “tigbutangbutang.” Pananglitan, sa paghisgot kang Judas, si Jesus miingon sa 12 ka apostoles, “Ang usa kaninyo tigbutangbutang” (Ju 6:70); ang mga babaye sa kongregasyon gipasidan-an nga dili magmabutangbutangon (1Ti 3:11; Tit 2:3); nga “ang mga tawo unya . . . mga tigbutangbutang” maoy usa sa mga pamatuod sa “kataposang mga adlaw.”—2Ti 3:1-5.
Ang balaod ni Jehova ngadto sa nasod sa Israel nagdili kanila nga magbutangbutang sa usag usa. (Lev 19:16) Ang konsepto sa tibuok Bibliya maoy batok sa maong dili-hustong paggamit sa dila.—2Sa 19:27; Sal 15:3; 101:5; Pr 11:13; 20:19; 30:10; Jer 6:28; 9:4.