JEHOVA ANAA DIHA, SI

Kini nga ekspresyon maoy hubad sa Yehwahʹ Shamʹmah, nga nagtumong sa siyudad nga nakita ni manalagnang Ezequiel diha sa iyang panan-awon nga girekord sa mga kapitulo 40 hangtod sa 48. (Eze 48:35) Ang siyudad nga nakita sa panan-awon gihulagway ingong kuwadrado (4,500 ka taas nga maniko sa usa ka kiliran [2,331 m; 7,650 p]) ug may 12 ka ganghaan, ang matag usa may ngalan sa usa sa mga tribo sa Israel. (Eze 48:​15, 16, 31-34) Ang siyudad nga nakita sa panan-awon diha sa tagna ni Ezequiel maiya sa “tibuok balay sa Israel.” (Eze 45:6) Ang ngalang Jehova-Sammah, o “Si Jehova Anaa Diha,” naghawas sa presensiya sa Diyos nga sama nianang gipahayag sa ubang mga teksto, sama sa Salmo 46:5; 132:​13, 14; Isaias 24:23; Joel 3:21; ug sa Zacarias 2:​10, 11, diin si Jehova, nga kaniya ‘ang langit sa mga langit dili makaigo,’ gihisgotan ingong daw nagpuyo diha sa usa ka yutan-ong siyudad o dapit.​—1Ha 8:27; tan-awa usab ang PANGULO.