MAKIR

[gikan sa lintunganayng pulong nga nagkahulogang “baligya”].

1. Ang unang ginganlan nga anak nga lalaki ni Manases pinaagi sa iyang Siryanhong puyopuyo. Gipundar ni Makir ang banay sa mga Makirnon ug gitawag nga “amahan ni Gilead.” Ang iyang asawa mao si Maaca, ug siya nakabaton ug mga anak nga lalaki sa panahong buhi pa si Jose. (Gen 50:23; Num 26:29; Jos 17:1; 1Cr 2:​21, 23; 7:14-17) Giilog sa “mga anak nga lalaki ni Makir” ang rehiyon sa Gilead, giabog ang mga Amorihanon, ug gihatagan sa maong distrito ingong panulondon. (Num 32:​39, 40; Deu 3:15; Jos 13:31) Si Zelopehad ug ang iyang mga anak nga babaye maoy gikan sa Manasesnong banay ni Makir. (Num 27:1; 36:​1, 2; Jos 17:3) Sa awit sa kadaogan ni Debora ug Barak, ang “Makir” daw gigamit sa balaknon nga paagi sa pagtumong sa tibuok tribo ni Manases.​—Huk 5:​1, 14.

2. Anak nga lalaki ni Amiel (ug pumoluyo sa Lo-debar) nga uban kaniya mipuyo ang anak nga lalaki ni Jonatan nga si Mepiboset hangtod nga si David nagpasugo kang Mepiboset ug mihimog tagana alang sa pag-atiman kaniya. (2Sa 9:4-7, 13) Sa ulahi, sa panahon sa pag-alsa ni Absalom, si Makir maoy lakip sa mga tawong nagtaganag pagkaon ug ubang mga kinahanglanon ni Haring David ug sa iyang mga kaubanan.​—2Sa 17:27-29.