MAMRE

[lagmit, Pinakaon Pag-ayo].

1. Usa ka Amorihanong pangulo kinsa, uban sa iyang mga igsoong lalaki nga si Aner ug Escol, mitabang kang Abraham sa pagparot kang Haring Kedorlaomer ug sa iyang mga kaalyado. Ang pasikaranan sa ilang pagtabang dayag nga mao ang ilang pagpakig-abin kang Abraham.​—Gen 14:​13, 24.

2. Usa ka dapit nga gituohan sa kadaghanan nga mao ang er-Ramat el-Khalil, mga 3 km (2 mi) sa A sa Hebron, apan gituohan sa pipila nga kini mas unahan pa dapit sa K, nga nahiuyon sa Genesis 23:17. (Tan-awa ang MAKPELA.) Kini mao ang pangunang pinuy-anan ni Abraham ug, sulod sa usa ka panahon, nahimong pinuy-anan ni Isaac. Sa duol nga langob sa Makpela, sila ug ang ilang mga asawa ingon man si Jacob ug Lea gilubong sa ulahi. (Gen 13:18; 35:27; 49:29-33; 50:13) Maayong pagkatubig ang dapit tungod sa daghang tubod niini. Dihay pundok sa dagkong mga kahoy sa Mamre sa panahon ni Abraham, ug dinhi siya nagtukod ug usa ka halaran alang kang Jehova. (Gen 13:18) Ilalom sa usa nianang mga kahoya, iyang giabiabi ang mga manulonda sa wala pa malaglag ang Sodoma ug Gomora. (Gen 18:1-8) Dinhi usab, si Jehova misaad kaniya ug usa ka anak nga lalaki pinaagi kang Sara. (Gen 18:9-19) Gikan sa usa ka dapit duol sa Mamre, malantaw ni Abraham ang tanan hangtod gayod sa Sodoma ug didto iyang nakita ang mabagang aso nga nagautbo ingong resulta sa kalayonhong kalaglagan sa maong dapit.​—Gen 19:27-29.

Sa dapit karon nga gituohang mao ang Mamre, ang dagkong mga kahoy (sagad mga robles) nakadawat ug makasaysayanhong pagtagad sa panahon ni Josephus hangtod sa presenteng adlaw. Latas sa daghang siglo ang mga ampoanan gitukod dinhi, sagad nga maylabot sa usa ka karaang kahoy nga gituohan nga mao ang kahoy nga sa ilalom niini si Abraham nakigsulti sa mga manulonda. Si Herodes nga Bantogan nagtukod ug usa ka paril nga bato palibot sa maong tradisyonal nga dapit. Human moduaw sa maong dapit ang iyang ugangang babaye sa ikaupat nga siglo K.P., si Emperador Constantino nagpatukod ug usa ka basilika didto. Human niadto gipakabalaan usab sa Muslim nga mga mananakop ang maong dapit.