SALAMIS

Usa ka iladong siyudad sa Cipro. Didto si Pablo, Bernabe, ug Juan Marcos “nagmantala sa pulong sa Diyos” sa hapit na magsugod ang unang misyonaryong panaw ni Pablo niadtong mga 47 K.P. Wala iasoy kon unsa sila kadugay miestar sa maong siyudad. Lagmit nga dihay dakong populasyon sa mga Hudiyo sa Salamis, sanglit dili lang usa ang sinagoga niini.​—Buh 13:2-5.

Ang Salamis sagad nga gituohang mao ang mga kagun-oban nga makaplagan mga 5 km (3 mi) sa A sa modernong siyudad sa Famagusta. Sa ingon kini nahimutang sa S nga tumoy sa usa ka dakong tabunok nga patag, sa A lamang sa suba sa Pedias (Pediaeus). Busa ang Salamis maoy mga 200 km (120 mi) sa KHK latas sa Dagat Mediteranyo gikan sa Seleucia, diin si Pablo mibiya sa Sirya. Bisan tuod ang Bibliya wala sa espesipiko mag-ingon nga ang barko nga gisakyan ni Pablo mipondo sa usa ka dunggoanan sa Salamis, ang siyudad kanhi may usa ka maayong dunggoanan nga karon natambakan na sa mga binanlas nga yuta.

Mopatim-aw nga ang Salamis nadugtong sa Pafos pinaagi sa usa ka dalan sa pikas tumoy sa pulo. Tingali tungod niini nga dali ra ang panaw ni Pablo ug sa iyang mga kauban samtang sila nagwali sa “tibuok pulo hangtod sa Pafos.”​—Buh 13:4-6.

Si Bernabe ug Juan Marcos lagmit nga miduaw pag-usab sa Salamis niadtong mga 49 K.P.​—Buh 15:36-39.