TARTAN

Ang Asiryanhong mga sinulat nagpakita nga ang titulong Tartan gipadapat ngadto sa usa ka opisyal nga taas ug ranggo, lagmit nga ikaduha lamang sa hari. Mahitungod sa han-ay sa mga titulo sa Asiryanhong mga listahan sa mga ngalan nga gigamit ingong ngalan sa usa ka butang, si James B. Pritchard, editor sa Ancient Near Eastern Texts (1974, p. 274), mikomento: “Sa ulahi, ang posisyon sa opisyal sulod sa herarkiya higpit nga gisunod pinasukad sa han-ay sa mga ranggo, ang kinatas-ang opisyal (tartanu) mao ang sunod dayon sa hari, samtang ang importanteng mga opisyal sa palasyo . . . ug ang mga gobernador sa iladong mga lalawigan nagpulipuli sa pagmando subay sa kahikayan nga maayong pagkahan-ay.” (Tan-awa ang KRONOLOHIYA [Ang eponym (limmu) nga mga listahan].) Ang usa ka inskripsiyon ni Haring Ashurbanipal sa Asirya, nga sa pagkakaron anaa sa British Museum, sa bahin, mabasa: “Nasuko ako pag-ayo tungod niini nga mga panghitabo, misilaob ang akong kalag. Gitawag ko ang turtan -nga opisyal, ang mga gobernador, ug usab ang ilang mga katabang ug gipakanaog dayon ang sugo.”​—Ancient Near Eastern Texts, p. 296.

Gipadala ni Haring Senakerib ang Tartan duyog sa ubang mga opisyal, lakip ang Rabsake, ang pangulong magtitiing sa hari nga nag-alagad ingong tigpamaba, aron ipahibalo ang ultimatum nga pasurenderon ang Jerusalem. Ang Tartan mao ang unang gilista, lagmit tungod kay siya labaw ug posisyon. (2Ha 18:​17, 28-35) Si Haring Sargon II sa Asirya nagpadala sa usa ka Tartan aron sa paglikos sa siyudad sa Asdod, sa mga adlaw sa manalagnang si Isaias.​—Isa 20:1.