Kinabuhi ug Ministeryo ni Jesus

Gihimaya sa Wala pa Siya Matawo

BAG-O pang natapos ang manulondang Gabriel sa pagsulti sa batan-ong babayeng si Maria nga siya manganak sa ka usa batang lalaki nga mahimong walay kataposang hari. Apan nangutana si Maria, ‘Unsaon sa pagkahimo niini, sanglit wala man ako makighilawas sa usa ka lalaki?’

‘Pagakunsaran ikaw sa balaang espiritu sa Diyos,’ miingon si Gabriel, ‘ug tungod niini ang bata nga matawo paganganlan nga Anak sa Diyos.’ Aron matin-awan si Maria, mipadayon si Gabriel: ‘Ang imong tigulang nga paryente si Elisabet, nga gikaingon sa mga tawo nga dili makaanak, karon unom na ka bulan nga nagsabak.’ Mituo si Maria kang Gabriel ug miingon: ‘Ipahinabo kanako kanang imong giingon.’

Sa paglakaw ni Gabriel, nangandam si Maria ug miadto sa pagduaw kang Elisabet nga nagpuyo uban sa iyang banang si Zacarias sa kabukiran sa nasod sa Judea. Gikan sa balay ni Maria sa Nazaret, halayo kaayong pagbiyahe kini nga tingali mokabat ug tulo o upat ka adlaw.

Sa miabot si Maria sa kataposan sa balay ni Zacarias, misulod siya ug nangomosta. Dihadiha napuno si Elisabet sa balaang espiritu, ug siya miingon kang Maria: ‘Bulahan ikaw taliwala sa kababayen-an, ug bulahan ang bata sa imong tiyan. Pagkadakong pribilehiyo kanako nga duawon sa inahan sa akong Ginoo! Kay, tan-awa! sa akong pagkadungog sa imong pangomosta, ang bata sa sulod sa akong tiyan miulpot sa kalipay.’

Mibatig dakong kalipay, si Maria miingon: ‘Sukad karon pagatawgon ako sa tanang tawo nga malipayon, tungod sa dakong mga butang nga gihimo sa Diyos alang kanako.’ Miestar si Maria kang Elisabet sa tulo ka bulan, ug sa walay duhaduha dako siyang tabang sa panahon niining kataposang mga semana sa pagsabak ni Elisabet. Pagkamaayo nga kining duha ka matinumanong mga babaye, nga pulos nagdala sa bata tungod sa tabang sa Diyos magkauban ning binulahang panahon sa ilang kinabuhi!

Imo bang namatikdan ang himaya nga gihatag kang Jesus bisag wala pa siya matawo? Gitawag siya ni Elisabet nga “akong Ginoo,” ug ang iyang wala pa matawong anak miulpot sa kalipay sa pag-abot ni Maria. Sa laing bahin, wala tahora sa uban si Maria ug ang iyang wala pa matawong anak, sumala sa ato unyang makita. Apan, sa among sunod nga artikulo, makabaton pa kita ug dugang kasayoran bahin sa anak ni Elisabet, si Juan. Lucas 1:26-56.

◆ Unsay gisulti ni Gabriel aron matin-awan si Maria sa pagsabot kon sa unsang paagi magsabak siya?

◆ Sa unsang paagi gihimaya si Jesus sa wala pa siya matawo?

◆ Unsa ka dugay nga miestar si Maria uban kang Elisabet, ug nganong tukma nga miestar si Maria kang Elisabet ning panahona?