Ang Kinabuhi ug Ministeryo ni Jesus

Ang Mag-aandam sa Dalan Natawo

SI Elizabeth duol nang manganak. Sa milabay nga tulo ka bulan si Maria mipuyo uban kaniya. Apan karon panahon na nga manamilit si Maria ug mohimo sa dugay nga pagpanaw aron mopauli sa Nazareth. Sa mga unom ka bulan siya, usab, manganak.

Wala madugay sa paglakaw ni Maria, nanganak si Elizabeth. Pagkadako sa kalipay sa milampos ang pagpanganak ug si Elizabeth ug ang bata maayo! Sa gipakita ni Elizabeth ang bata ngadto sa iyang mga silingan ug mga paryente, silang tanan miduyog sa iyang kalipay.

Sa ikawalong adlaw tapos sa iyang pagkatawo, sumala sa kasugoan sa Diyos, ang usa ka batang lalaki sa Israel kinahanglang sirkunsidahan. Alang sa maong okasyon ang mga higala ug mga paryente moduaw. Sila miingong ang batang lalaki paganganlan sumala sa iyang amahan, si Zacarias. Apan si Elizabeth mipahayag. ‘Dili!’ siya miingon. ‘Siya paganganlang Juan.’ Hinumdomi, kana ang ngalang giingon ni Gabriel nga igahatag sa bata.

Apan, mitutol ang ilang mga higala: ‘Walay mausa sa inyong mga paryente ang may ingong ngalan.’ Unya, pinaagi sa pagsenyas, ilang gipangutana kon unsay gusto sa iyang amahan nga ingalan sa batang lalaki. Nga nangayog papan nga sulatanan, si Zacarias, sa katingala sa tanan, misulat: ‘Ang iyang ngalan maoy Juan.’

Uban niana ang gahom sa pagsulti ni Zacarias milagrosong nahibalik. Imong mahinumdomang siya nawad-an sa iyang katakos sa pagsulti sa wala siya motuo sa pahibalo sa manulonda nga manganak si Elizabeth. Aw, sa nakasulti si Zacarias, ang tanang nagpuyo sa silinganan natingala ug nanag-ingon sa ilang kaugalingon: ‘Maunsa man kaha diay kining bataa?’

Karon si Zacarias napuno sa balaang espiritu, ug siya mitagna mahitungod sa iyang anak: ‘Siya pagatawgon nga usa ka manalagna sa Labing Hataas, ug siya magauna kang Jehova ug magaandam sa dalan alang kaniya. Siya magapahayag sa katawhan nga kinahanglang sila pagaluwason pinaagi sa pagpasaylo sa ilang mga sala.’

Sa maong panahon si Maria, si kinsa dayag dili pa minyo nga babaye, nakaabot na sa pinuy-anan sa Nazareth. Unsay mahitabo kaniya sa dihang mailhang siya nanamkon? Lucas 1:56-80; Levitico 12:2, 3.

◆ Pila ang pagkamagulang ni Juan kang Jesus?

◆ Unsang mga butang ang nahitabo sa dihang si Juan walo ka adlaw sa edad?

◆ Unsang buluhaton ang gitagna nga pagabuhaton ni Juan?