Ang “Mga Maghuhupot sa Integridad” nga Kombensiyon Haduol Na
Ang mapuslanong upat ka adlaw nga instruksiyon sa Bibliya nagapaabot kanimo sa “Mga Maghuhupot sa Integridad” nga Kombensiyon sa mga Saksi ni Jehova sugod ning bulana. Pinaagi sa matulon-anong mga diskurso, mga interbiyo sa beteranong mga ministro, ug praktikal nga mga demonstrasyon, itagana ang hinungdanong Kristohanong giya.
Maatua didto sa unang sesyon sa 1:30 sa hapon sa Huwebes. Ang pakigpulong sa tsirman, “Itugot nga ang Integridad Magpanalipod Kanato,” magapasiugda sa tema sa kombensiyon ug magpahinam sa tibuok upat-ka-adlaw nga programa. Gawas pa, sa unang sesyon imong madawat ang butang mahimong malungtarong hinabang sa pagpangatarongan sa uban gikan sa Kasulatan.
Sa buntag sa Biyernes, aduna unyay ipasundayag nga drama nga Imong Kaugmaon—Usa ka Hagit. Kini makapadasig ug dako sa mga batan-on. Pihong pabilhan kaayo nimog dako ang imong madawat sa Biyernes nga maikag kang ipaambit kana sa uban diha sa komunidad.
Ang programa sa Sabado punog praktikal nga instruksiyon sa Kristohanong pagkinabuhi. Isaysay kon unsay kahulogan ang paghupot sa imong mata nga yano ug kon unsaon pagsusi sa imong masambingayong kasingkasing. Ang kataposang presentasyon sa maong adlaw, “Integridad sa Kamatuoran sa Kalibotang Dili Diyosnon,” motagana kanimo sa butang matahom nga dili lamang imong mahalon kana kondili magaapektar gayod ug dako kaayo sa atong buluhaton sa pagsangyaw.
Ang programa sa Dominggo, ang kataposang adlaw, magpasiugda sa dramang may pamiste sa panahon sa Bibliya nga Kahadloki ang Diyos, Magpalayo sa Daotan, ingon man ang pakigpulong publiko, “Ang mga Panahon ug mga Yugto sa Diyos—Unsay Ginapunting Niana?” Tinuod nga matulon-anon, makapalipayng upat ka adlaw nga programa! AYAW SIPYATA ANG PAGTAMBONG!
Sanglit ang ginatos ka kombensiyon gieskedyul sa daghang bahin sa kalibotan, mahimong adunay usa sa duol sa inyong balay. Pakigkitai ang mga Saksi ni Jehova sa inyong dapit sa pagsusi sa panahon ug dapit sa usa nga labing duol kaninyo.