Mga Pangutana Gikan sa mga Magbabasa

◼ Unsay tukmang buhaton sa kongregasyon kon adunay mobiya sa matuod Kristohanong pagtuo ug magpamembro sa laing relihiyon?

Nahitabo usahay kining butanga sa unang siglo. Busa, masabtan nga may mga panahon nga mahitabo kini karon. Kon mahitabo man, tukmang molihok ang kongregasyon sa pagpanalipod sa espirituwal nga kahinlo sa maunongong mga Kristohanon diha niini.

Gibatbat sa usa ka diksyonaryo ang apostasiya ingong “pagsalikway sa usa sa iyang nga relihiyon, mga prinsipyo, politikal nga partido, ubp.” Lain miingon: “Ang apostasiya . . . 1 : pagsalikway sa relihiyosong pagtuo 2 : pagbulag sa giunongan kanhi.” Busa, si Judas Iscariote sad-an sa usa ka porma sa apostasiya dihang mibiya siya sa pagsimba kang Jehova nga Diyos pinaagi sa pagbudhi kang Jesus. Sa ulahi, ang uban nangahimong mga apostata pinaagi sa pagtalikod sa matuod nga pagtuo bisan sa buhi pa si apostol Juan ug ang ubang unang mga tinun-an. Si Juan misulat: “Sila namahawa gikan kanato, apan sila dili sama kanatog matang; kay kon sila sama pa kanatog matang, magpabilin unta sila uban kanato.”​—1 Juan 2:19.

Unsay buhaton kon may sama niini nga mahitabo karon? Ang mga ansiano, o mga magbalantay, sa kongregasyon tingali makabalitag usa ka bawtismadong Kristohanon nga mihunong na sa pakig-uban sa mga katawhan ni Jehova ug nakig-anib sa laing relihiyon. Kaharmoniya sa mga pulong ni Jesus bahin sa pagkabalaka sa usa ka karnerong nahisalaag, ang espirituwal nga mga magbalantay kinahanglang magpakitag kaikag sa pagtabang sa maong tawo. (Mateo 18:12-14; itandi sa 1 Juan 5:16.) Apan komusta kon ang mga magbalantay nga natudlo sa pagsusi sa maong butang nakapiho nga dili na buot makiglabot pa kanang tawhana sa katawhan ni Jehova ug desidido sa pagpabilin sa bakak nga relihiyon?

Ipahibalo lamang nila sa kongregasyon nga nagpa-disassociate siya sa iyang kaugalingon ug busa dili na usa sa mga Saksi ni Jehova. Ang maong tawo ‘mibulag sa iyang giunongon kanhi,’ apan dili na kinahanglag pormal nga aksiyon sa pagpalagpot? Ngano? Tungod kay mibulag na siya sa iyang kaugalingon gikan sa kongregasyon. Tingali wala siya makigkita pa sa iyang mga igsoon kanhi aron sa pagkabig kanila sa pagsunod kaniya. Sa ilang bahin, ang maunongong mga igsoon dili makig-uban kaniya, sanglit ‘mipahawa siya gikan kanila, kay dili man siya sama kanilag matang.’ (1 Juan 2:19) Ang maong tawo nga na-disassociate ‘mipahawa gikan kanato’ tingali mosugod sa pagpadalag mga sulat o mga basahon nga nagapasiugdag bakak nga relihiyon kun apostasiya. Nagapadayag lang kana nga ang indibiduwal sa tino ‘dili sama kanatog matang.’

Apan, ang Kasulatan nagpasidaan nga maningkamot ang uban sa pagpabilin sa katawhan sa Diyos ug didto mosulay sa pagdani sa uban. Si apostol Pablo nagtambag: “Gikan kaninyo adunay managpanindog nga mga tawo nga magasultig mga binalit-ad aron sa pagpamira sa mga tinun-an ngadto kanila.” (Buhat 20:30) Prangka niyang gipasidan-an ang mga Kristohanon sa ‘pagbantay niadtong maoy hinungdan sa pagbahinbahin ug pagkapangdol nga supak sa pagtulon-an nga ilang nakat-onan, ug likayi sila.’​—Roma 16:17, 18.

Busa kon adunay usa nga mahimong bakak nga magtutudlo taliwala sa matuod nga mga Kristohanon, sama sa gihimo ni Himenio ug Piletos sa mga adlaw ni Pablo, ang mga magbalantay sa panon kinahanglang mohimog mga lakang sa pagpanalipod. Kon isalikway sa tawo ang ilang mahigugmaong tambag ug magpadayon sa pagpasiugdag sekta, ang komite sa mga ansiano makahimo sa pagpalagpot, kaniya sa tungod sa apostasiya. (2 Timoteo 2:17; Tito 3:10, 11) Sundon sa tagsatagsa ka igsoong mga lalaki ug babaye sa kongregasyon ang tambag ni Pablo nga “likayan” ang usa nga maoy hinungdan sa “pagbahinbahin.” Sama usab ang tambag ni Juan: “Kon adunay moanha kaninyo ug kana siya dili magdala niining pagtulon-ana, ayaw ninyo siya pasak-a sa inyong balay o ayaw ninyo pagpangomostaha.”​—2 Juan 10.

◼ Dihang namauli ang mga Hudiyo sa Jerusalem gikan sa pagkabihag sa Babilonya, milakbay ba silag mga 500 ka milya (800 km) kun 1,000 ka milya (1,600 km)?

Duolan sa 500 ka milya ang kalay-on gikan sa karaang Babilonya ngadto sa Jerusalem. Kini nga paglakbay nagkahulogan sa pagtabok sa malisod kaayong lugar, lakip sa halapad kaayong ugang yuta o disyerto. Ang usa pa ka agianan doble ang kalay-on patungas sa walog sa Euphrates paingon sa Haran, ug dayon molugsong agi sa Damascus ngadto sa Yutang Saad. Miagi si Abraham ning ulahi nga rota dihang gidala ang iyang pamilya gikan sa Ur ngadto sa Canaan.​—Genesis 11:31-12:5.

Ang Bibliya wala magbatbat sa rota nga giagian sa mga Hudiyo dihang namauli sa Jerusalem gikan sa pagkabihag sa Babilonya. (Esdras 8:1-32; 7:7-9) Busa posible ang bisan hain niining duha ka numero ug mahimong gamiton dihang hisgotan ang paglakbay. Labi pang bililhon mao ang kamatuoran nga ang namauling mga Hudiyo kinahanglang libre sa Babilonyanhong mga pagtuo ug mga batasan samtang miagi sila sa “Agianan sa Pagkabalaan.”​—Isaias 35:8-10; itandi sa panid 153-7 sa basahong Man’s Salvation out of World Distress at Hand! gipatik sa 1975.