Gilead nga mga Misyonaryo—Debotado sa Usa ka Katuyoan
SA MIAGING semana kamo mga estudyante, sa sunod semana kamo mga misyonaryo na!” Kanang mga pulonga nagtimaan nga maayo sa pagbati sa 23 ka migraduwar nga estudyante sa ika-81ng klase sa Watchtower Bible School of Gilead. Alang kanila, ingon man sa 4,262 nga uban pang mitambong, ang programa sa graduwasyon nga gihimo sa Jersey City Assembly Hall sa mga Saksi ni Jehova, sa Septiyembre 7, 1986, mao unyay adlaw nga dugayng hikalimtan.
Si Martin Poetzinger nagbukas pinaagi sa pag-ampo ug dayon si Carey Barber, ang tsirman sa programa sa graduwasyon, nagpailaila sa programa pinaagi sa pag-ingong latas sa katuigan kaliboan sa maong mga ebanghelista ang nakaagi sa ilang pagbansay sa Gilead nga debotado sa usa ka katuyoan: nga ipadala ngadto sa kinatumyan sa yuta ingong matuod nga mga misyonaryo nga magasangyaw sa paglaom sa Gingharian. Pagkamalipayon natong kining bag-ong mga misyonaryo, sa espiritu sa ngalang “Gilead,” mahimong bahin sa ‘usa ka tumpok sa pamatuod’!
Si Milton Henschel, nga maoy nanguna sa programa, misaysay nga ang maong mga graduwado, sama sa mga apostol sa adlaw ni Jesus, giandam alang sa dakong buluhaton. Gipahayag nga maayo sa misyonaryong magbubuhat si Pablo ang iyang pagbati bahin sa maong buluhaton sa miingon siya: “Kay, bisan pag ako nahigawas gikan sa tanang tawo, akong gihimo ang akong kaugalingon nga ulipon sa tanan, aron akong maangkon ang kinadaghanang tawo.”—1 Corinto 9:19.
Unsay ginapakita niining mga pulong ni Pablo? Nga kining bag-ong mga misyonaryo kinahanglang maikag sa mga tawo. Angay nga maoy ilang tinguha ang pagtabang sa tanang matang sa katawhan pinaagi sa moluwas-sa-kinabuhing mensahe sa kamatuoran—bisan kadtong suod nakig-uban sa laing relihiyosong organisasyon.
Ang sunod nga mamumulong, si Theodore Jaracz, nagpahinumdom sa bag-ong mga misyonaryo nga, lahi sa mga turista nga moadto sa mga dapit aron motan-aw sa dapit, sila gipadala ngadto sa daghang nagkalainlaing siyudad sa kalibotan sa pagsangyaw sa maayong balita. Iyang gidasig sila sa paghinumdom sa panig-ingnan ni Jesus ug sa unang mga tinun-an ug sa iya sa modernong-adlawng mga misyonaryo, nga daghan kanila nagapadayon sa pag-alagad nga matinumanon diha sa ilang tinagsa ka asaynment. “Magbaton ug usa ka tumong sa hunahuna,” siya misaysay. “Ayaw itugot nga kamo mabalda sa materyalistikanhong mga pangagpas. Kon kamo may ‘yano’ nga mata, nan kamo may usa ka tumong sa hunahuna.” (Lucas 11:34) “Ingong Gilead nga mga misyonaryo,” siya midugang, “kamo debotado sa usa ka katuyoan—ang pagpangita sa mga takos ug pagsangyaw sa maayong balita.”
Ang tukma-panahong tambag gihatag ni Max Larson sa Komite sa Pabrika bahin sa kon unsang mga tikang ang himoon kon motungha ang mga suliran sa misyonaryong asaynment sa usa. “Ayaw pagsurender ug paghunong,” siya misaysay. “Sulbara ang inyong mga suliran.” Sa unsang paagi? “Pinaagi sa pagbaton sa hunahuna sa Diyos bahin sa mga butang.” (1 Corinto 2:11-16) Gipasiugda ni Larson ang bili sa pag-ampo kang Jehova alang sa iyang tabang ug gipasiugda ang panginahanglan sa regular nga pagtulotimbang sa mga misyonaryo sa ilang relasyon uban sa Diyos.
Si Lon Schilling sa Komite sa Watchtower Farms mipasiugda sa bili sa pag-ugmad ug paghupot padayon sa matarong tinamdan sa hunahuna. “Sa unsang paagi moobra ang inyong mga hunahuna kon moatubang sa usa ka hagit o kahimtang nga nagakinahanglan ug pagpasibo?” siya nangutana. “Ingong mga tawong may kagawasan sa pagpili, kita matag usa responsable sa kon unsay sangpotan sa mga butang.” Siya miingong ang Diyos “wala magkontrol kanato pinaagi sa langitnong remote-control nga sistema.” Busa, ang mga misyonaryo angay dili magdahom ug labaw gikan sa Diyos kay sa kon unsay makataronganon. Kadtong magpadayag ug kaandam nga giyahan ni Jehova nga Diyos pinaagi sa iyang Pulong, iyang espiritu, ug iyang organisasyon makahupot padayon sa matarong tinamdan sa hunahuna.
“Unsa ka hait ang inyong pagsabot sa mga prinsipyo?” Kana gisukna ni Ulysses Glass, usa sa mga instruktor sa Tunghaang Gilead. Pinaagi sa sunodsunod nga ilustrasyon, kining karaang instruktor nagpadayag nga “ang timbang, masinabtanon, di-matarog nga pagsabot sa mga prinsipyo makapaarang kanunay sa [mga misyonaryo] sa pagbutang kanunay sa hustong dapit sa intereses sa Gingharian.” Nga nagkupot sa usa ka prangkiyo sa itaas aron makita sa tanan, siya miingon nga, bisag gamay ug bili, ang pagkamapuslanon sa prangkiyo mao ang katakos niini sa pagtapot ngadto sa usa ka butang hangtod kini makaabot didto. “Himoa ang inyong kaugalingon nga sama niining prangkiyo,” matud niya, “ug pagtapot sa usa ka butang—ang inyong komisyon sa pagsangyaw—hangtod kamo makaabot nga luwas sa inyong destinasyon, sa pikas nga bahin sa dakong kasakitan.”
Si Jack Redford, instruktor sa Tunghaang Gilead ug mismo kanhing misyonaryo, sa iyang kataposang pakigpulong, naghisgot sa pipila sa mga hagit nga atubangon sa bag-ong mga misyonaryo. Iyang gipasiugda nga pinaagi sa pagbatog kompletong pagsalig kang Jehova sila makabuntog sa bisan unsang kababagan, kon kaha bag-ong pinulongan, kamingaw, pagpuyo uban sa laing mga tawo, pagpahiuyon ngadto sa laing kultura, o pagsulbad sa mga kasungian sa personalidad. Ang puntong iyang gipahayag mao: “Ayaw sulayi ang pagbuhat niana sa inyong kaugalingong kusog. Ang 1 Corinto 3:9 nagaingon, ‘Kita kaubang mga magbubuhat sa Diyos.’” Iyang gipasaligan sila: “Buhata ang inyong bahin ug kamo makasegurong buhaton ni Jehova ang iyang bahin.”
“Ang Watchtower Bible School of Gilead maoy gasa sa Diyos!” Uban nianang mga pulonga si Frederick W. Franz, ang presidente sa Sosyedad, nagbukas sa panapos nga pakigpulong sa buntag. Ang Tunghaang Gilead, siya miingon, “mao ang pagtaganag mga tawo nga mag-alagad nga mga saksi, usa ka buhing pamatuod sa kamatuorang ang Gingharian sa Diyos pinaagi kang Jesu-Kristo karon naglihok na.” Dayon iyang gipahinumdoman ang ika-81ng klase nga ang ilang pagkadebotado ngadto niining usa ka katuyoan nagabutang diha kanila sa usa ka dakong responsabilidad “tungod kay kamo moadto sa natad nga sangyawanan sa labing lisod nga panahon sa kasaysayan sa tawo. Busa gipahamtang ni Jehova kanato ang responsabilidad sa pagmantala sa maayong balita nianang Ginghariana ug sa pagpunting sa tanang tawo sa halayong mga suok sa yuta sa dalan sa Diyos sa kaikyasan.”
Ang kalipay ug pagpasalamat sa pribilehiyo sa pagtungha sa Tunghaang Gilead nadayag samtang gidawat sa migraduwar nga mga estudyante ang ilang mga diploma. Uban ang katin-aw sa ilang katuyoan ingong mga misyonaryo, ang ika-81ng klase sa Gilead, diha sa usa ka sulat ngadto sa Nagamandong Lawas ug sa pamilyang Bethel, mihukom sa pag-alagad nga maunongon sa intereses ni Jehova nga Diyos ug ‘pag-awit alang sa iyang ngalan’ taliwala sa kanasoran. (2 Samuel 22:50) Sa hapon, human sa presentasyon sa mga talan-awon sa pagsangyaw sa nangaging mga asaynment, sa New York ug sa misyonaryong natad, ug usab sa usa ka makapatandog modernong-adlawng drama, ang programa sa Gilead natapos uban ang pag-ampo pinaagi ni Lyman Swingle.
Ang 23 ka migraduwar nga estudyante dulot nagapaabot sa dakong kalipay sa misyonaryong pag-alagad. Ngano? Sumala sa gisaysay sa usa ka graduwado:
“Si Jesus miingon, ‘Ibaligya ang imong mga katigayonan, ug mahimong akong sumusunod, ug ipahayag sa bisan diin ang gingharian sa Diyos.’ [Mateo 19:21; Lucas 9:60] Ang tumong sa misyonaryong pag-alagad gidasig sa among tinguha sa pagtabang sa labing daghan nga among mahimo sa espirituwal nga paagi, sa bisan diin kami kinahanglanon ug labing mapuslan.”—Fredrick Steiner, naasayn sa Guatemala.
Makapauswag ka ba sa imong pag-alagad sa Diyos ug himoon kanang labawng mabungahon? Kon mao, nan panlimbasog, sama sa gibuhat niining migraduwar nga mga estudyante aron mahimo kang takos alang sa misyonaryong natad. Ang kinadak-an nilang kalipay, ug imoha usab, mao nga hikaplagan diha sa tugob nga kinabuhi sa dedikadong pag-alagad kang Jehova.—Malakias 3:10.
[Kahon sa panid 22]
“Ang pakigpulong ni Igsoong Larson nagpasabot kanako sa panginahanglan sa pagkaandam mohimog mga pagpasibo. Sa pagtuman sa akong papel ingong misyonaryo, kinahanglang likayan ko ang ‘unodnong kaisipan’ ug pangitaon, hinunoa, ang hunahuna ni Jehova ug ang iya sa iyang Anak, si Jesus.”—Alain Saint-Jean, naasayn sa New Caledonia.
[Kahon sa panid 23]
“Ang pakigpulong ni Igsoong Glass mitabang kanako sa pagsabot sa bili sa pagbaton sa matarong pagsabot sa mga prinsipyo. Kinahanglang dili ka magpabalda sa gagmayng mga butang. Kinahanglang kita matimbang.”—Humphrey Hermanus, naasayn sa Suriname.
[Kahon sa panid 24]
“Sa pagpamati kang Igsoong Redford, akong gibati ang kasegurohan sa pagkasayod nga ang mga sulirang among mahibalag dili kay bag-o. Ang uban milampos sa pagbuntog niana, ug mao usab kami kon mosalig kami sa kusog ni Jehova ug dili sa among kaugalingon.”—Veronica Lipham, naasayn sa Papua New Guinea.
[Kahon sa panid 24]
MGA ESTADISTIKA SA KLASE:
Kanasorang gihawasan: 7
Kanasorang giasaynan: 12
Aberids nga edad: 30.3
Aberids nga katuigan sa kamatuoran: 13.4
Aberids nga katuigan sa bug-os-panahong ministeryo: 9.3
[Mga Letrato sa panid 23]
COSTA, Alan ug Betty Tinipong Bansa
GANSLMEIER, Anton ug Rita Alemanya
GONZALES, John ug Cynthia Tinipong Bansa
GRAULICH, Uwe ug Katherine Alemanya
HERMANUS, Humphrey ug Ludmila Netherlands Antilles
JOHANSEN, Bård ug Ester Norway
KLOOSTERMAN, Otto ug Yvonne Netherlands
LARSON, Gary ug Annette Canada
LIPHAM, Mark ug G. Veronica Tinipong Bansa
SAINT-JEAN, Alain Pransiya
STEINER, Fredrick ug Helen Tinipong Bansa
SZYMANKSKI, Cynthia Tinipong Bansa
WILKE, David, Tinipong Bansa