Mga Pangutana Gikan sa mga Magbabasa
◼ Dihang mopirma ang usa ug Deklarasyon nga Nagsaad nga Mounong, mahimo bang taposon kanang kahikayana?
Ang pangutana may kalabotan sa probisyon nga dili maaplikar sa kadaghanang kayutaan. Busa ato unang susihon kon unsa kanang solemneng kahikayan sa pagkakaron.
Ang Bantayanang Torre sa Septiyembre 15, 1977, naghisgot ug problema nga naglungtad sa pipila ka yuta. Bisag gitugotan sa Diyos ang diborsiyo pinasukad sa Kasulatanhong katarongan, ang ubang mga kagamhanan walay probisyon sa diborsiyo. (Mateo 19:9) O gihimo sa balaod nga malisod ang pagkuhag diborsiyo, tingali nagkinahanglan kinig daghang mga tuig. Busa, kadtong maong gula sa magasin nagbatbat nga ang mga Saksi ni Jehova may panugot nga aplikado lamang niining mga yutaa; nalangkit niini ang Deklarasyon nga Nagsaad nga Mounong. Tagda ang usa ka pananglitan sa maong kahikayan:
Nakadangat ang usa ka babaye sa kahibalo sa Kristohanong kamatuoran samtang nag-ipon pa (ug tingali may mga anak) sa usa ka tawong dugay nang nagbulag sa iyang legal nga asawa. Ang bag-ong interesadong babaye maunongon iyang puyopuyo ug buot magpakasal kaniya, apan imposible kana tungod kay wala may probisyon diha sa balaod nga makahimo ang iyang puyopuyo sa pagdiborisyo sa iyang legal nga asawa. Busa, kon kombinsido ang mga ansiano sa kongregasyon nga ang iyang relasyon niining tawhana gikahimut-an sa Diyos, ilang tugotan siya sa pagpirma ug Deklarasyon nga Nagsaad nga Mounong. Iyang isulat didto nga gihimo na niya ang tanan aron mahimong legal kining relasyona; nga siya midawat atubangan sa Diyos sa pagkamabugkoson sa Deklarasyon; ug nga siya nagsaad nga magpakasal sa legal nga paagi dihang mahimo na, busa nagatapos sa Deklarasyon nga nakatugot kaniya nga mahimong bahin sa Kristohanong kongregasyon.
Apan, ang pangutana mobangon: Dihang siya (o bisan kinsa niana nga kahimtang) moabot sa kongregasyon nga nailalom niana nga Deklarasyon, duna bay laing paagi nga matapos kini o mahimong taposon?
Ang Deklarasyon mismo nag-ingon nga ang mipirma ‘miila sa iyang relasyon nga mabugkoson atubangan kang Jehova nga Diyos ug atubangan sa tanang tawo, nga tamdon ug pasidunggan ug bug-os ipasukad sa mga prinsipyo sa Pulong sa Diyos.’ Busa kini, sumala sa panglantaw sa kongregasyon, mabugkoson sa moral nga paagi ingong legal nga kaminyoon. Apan, ang kamatayon sa usa nga kapikas makatapos sa kaminyoon o paghiusa ilalom sa maong Deklarasyon. (Roma 7:2) Ang Bibliya nag-ingon usab nga kon ang usa nga kapikas sa kaminyoon sad-ad sa por·neiʹa (seksuwal nga imoralidad gawas sa paghiusa), ang walay sala nga kapikas makakuhag diborsiyo. (Mateo 5:32; 19:9) Sa katumbas, ilalom sa Deklarasyon nga Nagsaad nga Mounong, ang imoralidad sa usa nga kapikas mahimong basehanan sa pagtapos sa paghiusa, kon kini ang pilion sa usa nga walay sala. Kinahanglang pamatud-an sa walay salang Kristohanon diha sa mga ansiano ang pagkadilimaunongon. Kini makatapos sa Delarasyon; human niana ang walay sala libre na sumala sa Kasulatan.
Nahibalo nga gilantaw sa kongregasyon ang Deklarasyon nga Nagsaad nga Mounong nga mabugkoson sa moral nga paagi ingong legal nga kaminyoon may mobangong isyu nga nalangkit. Mahitabo kini kon ang kanhi nga babag sa kaminyoon mawala. Pananglitan, sumala sa gipakita sa ibabaw, ang legal nga asawa sa lalaki tingalig namatay o kaha gihimong legal sa kagamhanan ang diborsiyo, ug andam siya sa pagpakasal sa Kristohanong babaye sa legal nga paagi. Nianang paagiha ang igsoong babaye dili makapadayon ilalom sa Deklarasyon nga Nagsaad nga Mounong, bisan pa tungod sa mga katarongan nga maulaw siya nga magpakasal sa legal karon o kaha mawad-an siyag materyal nga mga bentaha. Sumala sa iyang Deklarasyon, kinahanglang mohimo siya karon ug mga lakang sa pagpalegal sa ilang paghiusa. Kay kondili, himoong nulo sa kongregasyon ang Deklarasyon, ug kinahanglang iyang bulagan ang lalaki kay kon dili ipalagpot siya.
Nan, komusta kon ang dili-magtutuo dili magpakasal kaniya? Dihang iyang gipirmahan ang Deklarasyon, gilantaw sa kongregasyon ang paghiusa ingong mabugkoson ug moral. Ang kamatuoran nga dili siya makapugos sa iyang dili-magtutuong kapikas sa pagpalegal sa ilang paghiusa wala magpahimo sa paghiusa nga imoral. Busa makapadayon siya nga maunongong kapikas, dili na kinahanglang makigbulag siya sa iyang dili-magtutuong kapikas, apan kinahanglang magpadayon siya sa iyang mga paningkamot sa pagpalegal sa paghiusa. (Kausaban kini sa komento diha sa “Mga Pangutana Gikan sa mga Magbabasa” sa Nobyembre 1, 1985.)—Itandi sa Maghuhukom 11:35; Lucas 18:1-5.
Siyempre, lahi ang situwasyon kon ang duha mipirma sa Deklarasyon ug nahimong bawtismadong mga Kristohanon. Niining kasoha, ang duha solemneng nanaad sa ilang kaugalingon sa pagsulod sa legal nga kaminyoon kon ang babag sa kagamhanan mawala, ug niining puntoha natapos ang Deklarasyon. Sila obligado sa pagbuhat niini sulod sa makataronganong panahon, kondili magbulag sila aron makapabilin diha sa kongregasyon. (Itandi sa “Mga Pangutana Gikan sa mga Magbabasa” sa The Watchtower sa Septiyembre 1, 1982.) Kon ugaling magbulag sila, ang mabugkoson sa moral nga Deklarasyon aplikado gihapon, busa ang duha dili libre sa pagminyo ug lain.—Itandi sa 1 Corinto 7:10, 11.
Bisan pa ug dili maaplikar ang Deklarasyon nga Nagsaad nga Mounong sa kadaghanang mga dapit, ang gihisgotan sa ibabaw nagasentro sa sukdanan sa Bibliya nga aplikado bisan diin: “Himoa nga madungganon sa tanan ang panagtiayon, ug ang higdaanan sa panagtiayon dili mahugawan, kay magasilot ang Diyos sa mga makihilawason ug mga mananapaw.”—Hebreohanon 13:4.