Mga Pangutana Gikan sa mga Magbabasa

◼ Unsay gipasabot sa 2 Samuel 18:8, nga nag-ingon: “Ang katawhan nga gilamoy sa kalasangan labi pa ka daghan kay sa gilamoy sa espada niadtong adlawa”?

Giagaw sa ambongang anak ni David nga si Absalom ang trono ug napugos ang iyang amahan sa pagkalagiw sa Jerusalem. Tapos niadto, diha sa kalasangan sa Ephraim (tingali sa sidlakan sa Suba sa Jordan) may nahitabong gubat tali sa mga sundalo ni Absalom ug sa mga maunongon sa dinihogang hari ni Jehova, nga si David. Ang asoy sa 2 Samuel 18:6, 7 nagtaho nga diha sa mainit nga gubat nakapatay ang mga sundalo ni David ug 20,000 ka rebelde. Sa lakbit, ang sunod nga bersikulo midugang: “Dugang pa, ang katawhan nga gilamoy sa kalasangan labi pa ka daghan kay sa gilamoy sa espada niadtong adlawa.”

Misugyot ang uban nga nagpunting kini sa rebeldeng mga sundalo, nga gikaon sa ihalas nga mga mananap nga nagpuyo sa lasang. (1 Samuel 17:36; 2 Hari 2:24) Apan wala kana magpasabot nga literal nga gilamoy sila sa mga mananap, sama nga wala lamoya sa “espada” sa literal kadtong nangamatay sa gubat. Sa aktuwal, ang gubat “mikaylap sa tanang dapit sa yuta.” Busa ang kalagmitang katin-awan niini mao nga ang napilding mga sundalo ni Absalom, nga mikalagiw sa kalisang diha sa batoong lasang, tingali nangahulog sa mga gahong ug sa natagong mga pangpang, ug nasabod sa baga nga kalibonan. Makaikag, ang asoy nagpadayon sa pagsaysay nga nabiktima sa Absalom mismo sa lasang. Tingali tungod sa iyang pagkabalhiboon, nasabod ang iyang ulo sa dakong kahoy, nga nagladlad kaniya sa makalilisang nga pag-atake sa mga sundalo ni Joab. Ang patayng lawas ni Absalom ‘gilabay sa dakong gahong sa lasang, ug gipatindog ibabaw kaniya ang usa ka dakong tapok sa bato.’​—2 Samuel 18:9-17.