Mga Magmamantala sa Gingharian Nagtaho
Gipanalanginan ni Jehova ang Ilang Lig-ong Pagbarog Alang sa Iyang Kasugoan
SA USA ka nasod sa Tungang Sidlakan, ang usa ka amahan nag-ayo sa nahiyos nga ligid sa daplin sa karsada sa dihang nabanggaan sa usa ka sakyanan ang iyang kuwatro-anyos nga anak lalaki ug unya misutoy ra sa pagpadagan. Uban sa bata nga gisabak sa inahan, ang amahan mipadulong sa kinadul-ang ospital nga unya gitudlo sa laing ospital nga 25 kilometros ang kalayo. Mihukom ang doktor nga ang batang lalaki may hemoreds sa sulod ug gikinahanglan niya ang operasyon ug abuno sa dugo. Miuyon ang walo ka ubang doktor. Kay nasayod sa kasugoan sa Diyos batok sa abuno sa dugo, ang mga ginikanan wala mosugot. “Kamo may lima lang ka minutos sa paghukom o kon dili kamo mosugot dili na namo tambalan ang inyong anak bisan pag mouyon kamo sa ulahi sa abuno sa dugo,” mibahad ang doktor. Kasamtangan, ang tiyan sa bata misamot sa paghubag ug nagsingabot sa peligrosong kahimtang.
Ang igsoong lalaki sa unod sa amahan, nga wala sa kamatuoran, nagpugos sa amahan sa pagtugot ug abuno sa dugo. Siya miingon pa: “Palihog isipa kining bataa nga dili imoha kondili akoa. Sanglit ginatugaw ka sa imong konsensiya, ako ang mangabaga, apil sa gastos sa ospital, aron kahatagan ang bata sa gikinahanglang dugo. Kini bugtong mong anak.” Lisod masuklan ang pagpugos, pero nagmalig-on ang mga ginikanan sa ilang desisyon.
Gidala nila ang bata ug milakaw nga nangita sa usa ka ospital apan sila nahisalaag. Sa sulagma nakita nila ang laing ospital, ug sila misulod niana, bisan pag kadto dili mao ang ilang gipangita. Tapos matan-aw ang bata, ang doktor miingon: “Ang paghubag sa tiyan sa bata mahimong ilhanan sa hemoreds sa sulod o mahimong dili. Pakatuloga ang bata ug ugma atong himoon ang gikinahanglang mga pagsusi aron masayran.” Gipadayag sa mga pagsusi nga walay hemoreds, apan ang panghubag maoy tungod sa aksidente. Dili kinahanglan ang operasyon. Ngani, ang doktor miingon nga peligroso unta ang operasyon. “Salamat kang Jehova,” matud sa mga ginikanan, “tungod sa pagluwas sa among anak ug sa pagtultol kanamo ngadto sa hustong ospital ug sa hustong doktor.”
Napulo ka tuig sa ulahi, unsa ang resulta niadtong situwasyona? Ang amahan miasoy: “Ang igsoon kong lalaki sa unod nga nagpugos kanako didto sa ospital nakaapresyar sa among baroganan ug nakasabot sa pagtultol ni Jehova sa maong hitabo. Kadto nakapukaw sa iyang interes sa kamatuoran, nga iyang gidawat, ug siya karon bawtismado ug nagaalagad nga usa ka ansiano sa kongregasyon. Ang iyang asawa ug mga anak nagaalagad kang Jehova nga madasigon kauban niya. Ang duha nako ka laing igsoong lalaki anaa usab sa kamatuoran uban sa ilang mga pamilya, ug usa kanila nagaalagad nga ministeryal nga alagad. Ang akong amahan ug inahan nabawtismohan karong bag-o bisan pa sa ilang pagkatigulang. Busa, bisan tuod kadto teribleng kasinatian alang sa akong asawa ug kanako, tungod niadto mga 30 ka membro sa akong pamilya nagdawat sa kamatuoran; ang pipila nabawtismohan na ug nagaalagad nga mga ansiano ug ministeryal nga mga alagad. Ang uban pa hapit nang mabawtismohan. Ang akong anak, karon 14 anyos na, maoy himsog, madasigong magmamantala, ug siya nagapanan-aw sa bawtismo. Pagkamapasalamaton sa akong asawa ug kanako kang Jehova tungod sa pagtabang kanamo sa paghimo sa hustong desisyon nga nahiuyon sa iyang balaod nga gipahayag sa Buhat 15:29”!
[Hulagway sa panid 27]
“Magpadayon kamo sa paglikay sa mga butang hinalad sa mga diyosdiyos ug sa dugo”