Nakahinumdom Ka Ba?

Nakita ba nimo ang dili pa dugay nga mga gula sa Ang Bantayanang Torre nga may praktikal nga bili alang kanimo? Nan nganong dili sulayan ang imong panumdoman uban sa mosunod?

◻ Unsay atong kinahanglang buhaton aron atong mabatonan ang panaghiusa ug pakigdait sa mga tawo sa tanang rasa nga gilarawan diha sa Isaias 2:4?

Una, kinahanglang atong dawaton nga ang atong Maglalalang, si Jehova, adunay katungod sa pagtudlo kanato “bahin sa iyang mga dalan.” Ug ikaduha, kita kinahanglan adunay tim-os nga tinguha sa pagsunod sa mga kasugoan sa Diyos pinaagi sa pag-ingon: “Manlakat kita sa iyang mga alagianan.” (Isaias 2:2, 3)—12/15, panid 5, 6.

◻ Nganong ang mga Saksi ni Jehova dili maluya ug maguol sa tibuok-kalibotang pagdumot ug pagsupak?

Si Jesus nagtagna nga ang maong pagsupak ug pagdumot maoy ilhanan sa matuod nga mga magsisimba. (Juan 15:20, 21; 2 Timoteo 3:12) Busa ang mga magmamantala sa maayong balita mapalig-on nga sila nakabaton sa balaang pag-uyon. Dugang pa, ang mga Saksi ni Jehova nahibalo nga sila nakabaton sa pagpaluyo sa Labing Hataas nga Diyos, si Jehova.—1/1, panid 12.

◻ Unsa ang pipila ka pangunang mga kinahanglanon nga kinahanglan natong kab-oton aron tubagon ang atong mga pag-ampo?

Kita kinahanglang tim-os nga motuo nga naglungtad ang Diyos. Kita kinahanglang “masibotong mangita kaniya,” masaligon nga siya moganti niadtong nagahimo niini. (Hebreohanon 11:6) Dugang pa, kita kinahanglang moduol kang Jehova pinaagi kang Jesu-Kristo ug siya lamang. (Juan 14:6, 14)—1/15, panid 4, 6.

◻ Unsa ang “diyosnong debosyon”? (1 Timoteo 3:16)

Ang diyosnong debosyon maoy pagtahod, pagsimba, ug pag-alagad sa Diyos, uban ang pagkamaunongon ngadto sa iyang unibersohanong pagkasoberano.—1/15, panid 11.

◻ Kinsa ang “tawo sa kalapasan” nga gihisgotan ni Pablo diha sa 2 Tesalonica 2:3?

Si Pablo wala maghisgot ug usa ka tawo, kay siya nag-ingon nga kining maong “tawo” napadayag na sa mga adlaw ni Pablo ug magpadayon sa paglungtad hangtod nga pagalaglagon siya ni Jehova sa kalaglagan niining sistemaha. Busa, ang “tawo sa kalapasan” maoy usa ka simboliko nga ekspresyon. Ang ebidensiya nagpakita nga siya maoy pundok sa hambogiro, ambisyosong mga klerigo sa Kakristiyanohan, nga sa kasiglohan nagpatindog sa ilang kaugalingon ingon nga balaod sa ilang kaugalingon.—2/1, panid 11.

◻ Sa unsang paagi ang kadalo mawala?

Ang kadalo sa mga tawo mawala lamang pinaagi sa tukmang edukasyon ug pagbansay, uban ang istriktong mga giya, o mga balaod sa paggawi, nga pagasundon. Ang maong edukasyon kinahanglan magagikan sa usa ka tuboran nga libre mismo gikan sa kadalo. Ang Diyos lamang sa langit ang makatagana niining matanga sa edukasyon, ug kini makita diha sa iyang sinulat nga libro, ang Balaang Bibliya.—2/15, panid 5.

◻ Aron ang maong personal nga pagtuon sa Bibliya mosangpot sa pag-ugmad nimo sa diyosnong debosyon, unsay kinahanglan ilakip sa pagtuon?

Ang imong tumong sa personal nga pagtuon dili mahimong mao lamang ang pagkobre sa mga panid sa materyal o pagpuno sa imong kaisipan sa impormasyon. Hinunoa, dihang ikaw mobasag usa ka bahin sa Pulong sa Diyos, kinahanglang mogahin kag panahon sa pagpalandong sa materyal aron matino kon unsay gitudlo niini mahitungod sa mga hiyas ug mga dalan ni Jehova aron ang estudyante labaw nga mahisama kang Jehova niining mga bahina.—3/1, panid 13.

◻ Nganong ang imong personal nga pagtuon sa Bibliya kinahanglang maglakip sa regular nga pagbasa sa mga asoy sa Ebanghelyo ni Jesus?

Ang pananglitan ni Jesus makatabang kanato sa pag-ugmad sa diyosnong debosyon. Si Jesus sinati sa iyang Amahan labaw pa kay kang bisan kinsa, busa siya suod nga nakasundog sa mga dalan ug mga hiyas ni Jehova. Busa, siya nagpatindog alang kanato ug hingpit nga pananglitan sa diyosnong debosyon. (Juan 1:18; 14:9; Roma 13:14)—3/1, panid 18.

◻ Diha sa ilustrasyon ni Jesus bahin sa mga talento, unsay kahulogan sa pagpalakaw sa mga talento? (Mateo 25:19-23)

Ang pagpalakaw sa mga talento nagkahulogan sa matinumanong paglihok ingong mga embahador sa Diyos, sa paghimog mga disipulo, ug sa pag-apod-apod sa espirituwal nga mga kamatuoran ngadto sa panimalay sa Diyos. (Mateo 24:45; 28:19, 20; 2 Corinto 5:20)—3/15, panid 13.

◻ Diha sa unsang tulo ka bahin nga nahimong talagsaon ang Bibliya kon itandi sa tanang mga tuboran sa tambag?

Una, ang tambag niini mapuslanon kanunay. (Salmo 93:5) Ikaduha, ang Bibliya nakabarog sa pagsulay sa panahon. (Isaias 40:8; 1 Pedro 1:25) Ikatulo, ang masangkaron nga tambag sa Bibliya dili-hitupngan. Bisan unsa pay problema o desisyon nga atong atubangon, adunay kaalam diha sa Bibliya nga makatabang kanato.—4/1, panid 13.

◻ Unsa ang duha ka linya sa ebidensiya nga nagpakita nga ang Bibliya mao ang Pulong sa Diyos, dili sa tawo?

Ang walay-sama nga kaalam sa Bibliya ug ang gahom niini sa pagbag-o sa mga tawo. (Proverbio 2:1, 5, 6; Hebreohanon 4:12)—4/1, panid 21.