“Kami Karon May Kaugalingon Nang Kingdom Hall”
DAGHAN ang nahipatik mahitungod sa daling-natukod nga mga Kingdom Hall sa mga nasod sama sa Gran Britanya, Canada, ug Tinipong Bansa. Hinuon, wala kaayo mahibaloi mao ang kamatuorang ang daling-natukod nga mga dapit sa pagsimba alang sa mga Saksi ni Jehova gibuhat sa tinagpulo ka katuigan diha sa gitawag nagkaugmad nga mga nasod.
Sa Aprikanhong kayutaan ang lokal nga mga Saksi kadaghanan nagatukod ug temporaryong mga pasilidad alang sa distritong mga kombensiyon sa mga semana lamang. Kini sila nag-alagad dili lamang mga dapit alang sa mga tigom ug silonganan gikan sa init kaayong adlaw sa tropiko apan puy-anan usab sa mga delegado. Ang susamang mga kasinatian ikasugid bahin sa Sentral Amerika.
Pananglitan, sa Guatemala City, Guatemala, ang $200 nga amot gipadala ngadto sa Vivibien Kongregasyon sa mga Saksi ni Jehova. Sa dihang gitanyag sa usa ka lokal nga Saksi ang usa ka lote sa banika, gihukom sa mga Saksi nga gamiton ang amot sa pagtukod ug igoigong estruktura nga magamit alang sa ilang mga tigom.
Gamiton ang kawayan alang sa bungbong nga abot sa gihabogon nga 1.5 metros; ibabaw niana maoy abling espasyo alang sa bentilasyon. Gihukom nga ang estruktura maoy 4 metros por 6 metros sa gidak-on. Sa giduaw sa mga ansiano sa kongregasyon ang lugar, sa ilang katingala nakaplagan nila sa atubangan sa lote ang daghang kawayanan, nga 6 metros hangtod 9 metros sa gihabogon ug gikan sa 8 sentimetros ngadto 13 sentimetros sa diametro. ‘Nganong dili magtukod sa sunod nga Sabado?’ matud nila.
Sa sunod Miyerkoles sa gabii, gihimo ang mga plano sa pagtukod. Sa Huwebes ang usa ka igsoong lalaki nagpalit ug sin para atop, ang lain sa tabla, ug ang lain sa mga lansang. Sa pagkahapon sa Huwebes ang tabla natabas na daan sumala sa sukod, ug gisugdan nila pagbuhat ang A-preym-tipo nga mga salagunting uban sa inamot puthawng mga palid. Sa pagkagabii sa Biyernes andam na ang mga salagunting.
Sayo sa buntag sa Sabado, ang usa ka trak naghakot sa mga salagunting ug sa ubang tabla, sa sin, ug mga lansang ngadto sa balangay. Upat ka sakyanan ang nagdala sa mga 50 ka lalaki, mga babaye, ug mga bata ngadto sa balangay. Sa pagka alas 8:00 s.b. ang tanan nangabot na.
Ang mga bangag nga gisilsil diha sa gahing bolkanikong bato gibutangan sa pangunang mga haligi. Sa nangagi, ang mga Saksi nagpalit gikan sa tag-iya sa kawayanan 50 ka bolos sa kawayan sa tag 12 cents ang matag usa—total nga gasto nga $6. Sa madali, ang mga sundang nagputol sa kawayan. Kini sila gigabas nga kinamot ngadto sa 1.5 metros sa gitas-on ug gibuak sa tunga.
Samtang gitaod ang mga salagunting, ang ubang mga kamot naglansang sa binuak nga kawayan nganha sa nagkurus nga mga lipak, katunga sa gawas ug katunga sa sulod, mao nga ang nindot nalingin nga kawayan mag-adorno sa sulod nga mga bungbong ingon man sa gawas. Sunod, ang sin gitaod samtang ang uban nagdala sa bato ug yuta aron mapatag ang yuta nga salog. Sa wala pa mongitngit ang 12-oras nga estruktura nahuman, ug ang mga igsoon namauli sa ilang balay sa siyudad nga may malipayong mga kasingkasing.
Sa ulahi, ang mga dahon sa kahoyng pino gikatag sa yuta nga salog, ug ang pila ka silyang mapiko ug pila ka bangko nga kawayan nga ginama gikan sa wala-magamit nga mga bolos sa kawayan gitukod. Karon ang Kingdom Hall andam na alang sa unang tigom.
Sa daghang kayutaan sa tropiko—Aprika, Pasipiko ug kaislahan sa Caribbeano, Asia, Mexico, Sentral ug Sur Amerika—diin tingali ang usa ka milyong Saksi ni Jehova nagapuyo, ang maong simpleng mga estruktura nakahatag kalipay sa lokal nga mga Saksi kay sila makaingon: “Kami may kaugalingon nang Kingdom Hall.”