Nakakaplag Siyag Usa ka Pulyeto sa Riles

ANG tuig maoy 1921. Sa kabukiran sa Transvaal, usa ka probinsiya sa South Africa, usa ka tem sa mga tawong nagmentenar sa riles sa tren ang nagtrabaho ubay sa hataas nga riles sa tren. Ang superbisor sa mga trabahante, usa ka Afrikaner nga ginganlang si Christiaan Venter, nakamatikod sa usa ka pliegong papel nga naipit sa riles. Kadto usa ka pulyetong gipatik sa Watch Tower Bible and Tract Society.

Human sa pagmando sa iyang mga tawo sa paghunong, gibasa ni Christiaan ang pulyeto uban ang dakong interes. Midagan siya sa pagsugat sa iyang umagad-nga-lalaki, si Abraham Celliers, ug mipahibalong maukyabon: “Abraham, karong adlawa ako nakakaplag sa kamatuoran!”

Sa wala madugay human niadto, misulat sila ngadto sa mga magpapatik sa pulyeto alang sa dugang impormasyon. Sa pagtubag, ang sangang-buhatan sa Watch Tower Society sa South Africa nagpadalag dugang mga basahon sa Bibliya. Ang duha ka lalaki nag-usa sa pagtuon niana panahon sa mga pahulay nila alang sa paniudto ug hangtod sa mga oras sa lalom nang ­gabii. Sa wala madugay misugod sila sa pagpakig-ambit sa kamatuoran uban sa mga higala ug mga estranghero.

Sa kadugayan, si Christiaan ug si Abraham nangahimong dedikadong mga Saksi ni Jehova. Ingong resulta sa ilang kadasig ug pagkamatinumanon, daghang taga-South Africa ang natabangan sa pagdangat sa kahibalo sa kamatuoran. Dugang pa, kapin sa usa ka gatos sa ilang mga kaliwat ang aktibong mga Saksi ni Jehova karong adlawa! Usa kanila nagaalagad sa hedkuwarter sa kalibotan sa mga Saksi ni Jehova sa Brooklyn, New York, ug ang lain sa mga opisina sa Watch Tower Society sa South Africa.

Karong adlawa, mga 70 ka tuig sa ulahi, ang mga pulyeto sa Bibliya nagpadayong may dakong bahin sa pagsabwag sa mensahe sa Gingharian.