Nakahinumdom Ka Ba?

Nakita ba nimo ang dili pa dugay nga mga gula sa Ang Bantayanang Torre nga may praktikal nga bili alang kanimo? Nan nganong dili sulayan ang imong panumdoman uban ang mosunod?

◻ Unsa ang mga kamatuoran nga nagabatok sa pagbalaan sa ginaingong dapit nga natawhan ni Jesus?

Ang Bibliya wala maghisgot sa eksaktong lugar nga natawhan ni Jesus. Gamay lamang impormasyon ang gihatag sa mga asoy sa Ebanghelyo ni Mateo ug Lucas. (Mateo 2:1, 5; Lucas 2:4-7) Ang pagbasa sa Juan 7:40-42 nagpakita nga ang mga tawo sa katibuk-an wala mahibalo sa lugar nga iyang natawhan, ang uban naghunahuna nga siya natawo sa Galilea. Lain pa, sa kaugalingon yutan-ong kinabuhi ni Jesus, wala gayod niya ipaanunsiyo ang mga detalye bahin sa iyang pagkatawo.​—12/15, panid 5.

◻ Sa unsang paagi mahuptan sa usa ka Kristohanon ang iyang kalipay samtang ginasagubang ang mga pagsulay sa pisikal nga balatian, depresyon, ug kalisod sa panalapi?

Ang Pulong sa Diyos nagtagana sa gikinahanglang paglipay ug paggiya. Pinaagi sa pagbasa o pagpamati sa mga salmo, ang dakong panginahanglan ug kahupayan ang mahatag. Si David nagtambag kanato: “Itugyan mo kang Jehova ang imong palas-anon, ug siya magasapnay kanimo.” Siya nagpasalig usab kanato nga si Jehova sa pagkamatuod mao ang “Tigpatalinghog sa pag-ampo.” (Salmo 55:22; 65:2) Ang organisasyon ni Jehova, pinaagi sa mga publikasyon ug sa mga ansiano sa kongregasyon niini, kanunayng andam sa pagtabang kanato sa pag-atubang sa atong mga suliran.​—1/1, panid 14-15.

◻ Unsay gipasabot ni Jesus dihang sa iyang pagpaingon aron ilansang, siya miingon: “Kay kon ang ang kahoyng lunhaw gibuhatan man gani nila niini, unsa man kahay dangatan sa laya na?” (Lucas 23:31)

Ang gihisgotan ni Jesus mao ang kahoy sa Hudiyonhong nasod. Tungod sa presensiya ni Jesus ug sa nahibilin sa mga Hudiyo nga nagtuo kaniya, ang nasod may mabilin pa nga kaumog sa kinabuhi niini. Apan, sa dihang kining tanan gikuha gikan sa nasod, ang patay sa espirituwal nga kahoy lamang ang nagpabilin, usa ka laya nasodnong organisasyon.​—1/15, panid 9.

◻ Sa unsang paagi “ang putli nga kasingkasing,” nga gihisgotan sa Mateo 5:8, “makakita sa Diyos”?

Sila “makakita sa Diyos” kon ilang makita siya nga nagalihok alang sa mga maghuhupot sa integridad. (Itandi ang Exodo 33:20; Job 19:26; 42:5.) Apan, ang Gregong pulong diha sa Mateo 5:8 nga gihubad “makakita” nagkahulogan usab ug “pagkakita pinaagi sa hunahuna, sa pagsabot, sa pagkahibalo.” Sanglit si Jesus hingpit nga nagpabanaag sa personlidad sa Diyos, ang pagsabot sa maong personalidad nakahimo sa “putli ug kasingkasing” nga “makakita sa Diyos.” (Juan 14:7-9)​—1/15, panid 16.

◻ Nganong kita makaingon nga si Jesus mao ang arkanghel nga si Miguel?

Ang Pulong sa Diyos naghisgot lamang ug usa ka arkanghel, ug kini naghisgot mahitungod sa maong manulonda may kalabotan sa pagkabanaw sa Ginoong Jesus: “Ang Ginoo gayod mao ang manaog gikan sa langit inubanan ug singgit sa pagsugo ug sa tawag sa tingog sa arkanghel ug sa tingog sa trumpeta sa Diyos.” (1 Tesalonica 4:16) Diha sa Judas 9 atong makita nga ang ngalan sa maong arkanghel mao si Miguel.​—2/1, panid 17.

◻ Unsa ang upat ka dapit nga atong ikapasundayag ang atong pagtahod sa ubang mga tawo?

Kinahanglan magpakita kita ug pagtahod sa politikanhong mga magmamando, sa mga amo, sa sakop sa sirkulo sa atong panimalay, ug sa uban diha sa kongregasyon.​—2/1, panid 20-2.

◻ Sa hapit nang mamatay si Jesus, unsang maayong panig-ingnan ang iyang gihatag alang sa tigulang nga mga ginikanan?

Samtang nagbitay pa si Jesus nga nag-antos diha sa kahoy sa pagsakit, iyang gihatagan ug pagtagad ang pisikal ug espirituwal nga kaayohan ang iyang inahan pinaagi sa pagpiyal kaniya sa pag-atiman sa iyang minahal nga apostol Juan. (Juan 19:25-27)​—2/15, panid 8.

◻ Nganong kinahanglan mag-antos si Jesus?

Ang pag-antos ni Jesus nag-alagad sa paghusay sa isyu sa integridad sa mga alagad sa Diyos. Sila usab gisangkapan niya alang sa iyang papel ingong maluloy-on Hataas nga Saserdote alang sa katawhan. (Hebreohanon 4:15)​—2/15, panid 14-15.

◻ Unsa ang dakong isyu nga gibangon sa rebelyon sa Eden?

Ang tawo ba nakamando sa kaugalingon nga bulag gikan sa Diyos? Makataronganon ba sa bahin sa Diyos ang pagpangayog pagpasakop sa iyang pagkasoberano? Kon palugwayan pa, may mga tawo ba nga sa dili-mahakogon mopili sa pag-alagad sa Diyos sa ilang kaugalingong kabubut-on?​—3/1, panid 6.

◻ Nganong ang pipila nasayop sa pakig-ambit sa mga emblema sa Memoryal?

Ang ubang mga dili-hamtong tingali wala pay timbang nga pagsabot sa mga katuyoan sa Diyos. Sila tingali wala moila nga ang pagdihog “nagaagad, dili sa kabubut-on sa tawo o sa iyang paningkamot, kondili sa Diyos.” (Roma 9:16) Dili iya sa indibiduwal ang paghukom nga siya buot nga madala ngadto sa bag-ong pakigtugon ug mahimong usa ka kaubang manununod ni Kristo. Ang pagpili ni Jehova mao ang hinungdanon, ug ang iyang espiritu nagapamatuod sa mao nga pagpili. (Roma 8:16; 1 Corinto 12:18)​—3/15, panid 21.

◻ Unsa ang “putli nga pinulongan” ang gihisgotan diha sa Sofonias 3:9?

Ang tukma nga pagsabot sa kamatuoran mahitungod sa Diyos ug sa iyang mga katuyoan.​—4/1, panid 21-2.