Mga Pangutana Gikan sa mga Magbabasa
◼ Unsang paninugdang tambag ang gitanyag sa Proverbio 27:23 alang sa espirituwal nga mga magbalantay ingon man sa mga Kristohanon sa katibuk-an?
Ang bersikulo mabasa: “Angay nga makaila ka sa tino sa dagway sa imong panon. Ibutang ang imong kasingkasing nganha sa imong mga panon.” (Proverbio 27:23) Kining tekstoha subsob gigamit aron sa pagdasig sa espirituwal nga mga magbalantay sa pagpakitag kaikag ug pagsinati sa kahimtang ug mga suliran sa mga Kristohanon diha sa kongregasyon. Angay ang maong pagdasig, sanglit gipanig-ingon sa Bibliya ang mga ansiano ngadto sa mga magbalantay ug ang kongregasyon ngadto sa usa ka panon sa mga karnero. (Buhat 20:28, 29; 1 Pedro 5:2-4) Ugaling, bisan pag mapadapat ang prinsipyo sa itaas, kining bersikuloha sa panguna dili mahitungod sa espirituwal nga mga magbalantay.
Ang basahon sa mga Proverbio naundan ug daghang bersikulo nga sa kaugalingon magbarog ingong undanon nga mga pahayag sa panambag, apan ang Proverbio 27:23 maoy bahin sa usa ka grupo sa mga bersikulo: “Angay nga makaila ka sa tino sa dagway sa imong panon. Ibutang ang imong kasingkasing nganha sa imong mga panon; kay ang bahandi dili magapadayon sa panahong walay tino, ni ang usa ka diadema sulod sa tanang kaliwatan. Ang lunhaw nga balili nangahanaw, ug ang bag-ong balili nanggimaw, ug ang mga utanon sa kabukiran nahipos na. Ang mga nating karnero maoy alang sa imong sapot, ug ang mga laking kanding mao ang bili sa uma. Ug adunay igo nga gatas sa mga kanding alang sa imong pagkaon, alang sa pagkaon sa imong panimalay, ug kabuhian alang sa imong kadalagahan.”—Proverbio 27:23-27.
Kining dinasig nga mga teksto nagadayeg sa pagbaton sa usa ka paagi sa kinabuhi nga tiniman-an sa pagkamanggibuhaton, kakugi, kayano, ug pag-ila sa atong pagdepende kang Jehova. Ginahimo kini pinaagi sa pagpasiugda sa kinabuhing banikanhon sa usa ka Israelinhong magbalantay, tingali katugbang sa mabulakon nga kinabuhi nga gipasukad sa mga kahikayan sa patigayon ug sa bahandi nga daling naangkon.
Ang “bahandi,” o katigayonan nga naangkon sa dali nga mga patigayon, uban sa misangpot nga pagkailado (“diadema”), mahimong mawala ra dayon, sumala sa pamatud-an sa daghan. Busa daghan ang igapamulong pabor sa yano nga kinabuhi, sama sa gisunod sa karaang mga magbalantay sa pag-atiman sa kahayopan. Kanang paagiha sa kinabuhi dili yano sa diwa nga pagkawalay budlay. Ang magbalantay kinahanglang magmatinagdanon sa iyang panon, nga maneguro nga mapanalipdan ang mga karnero. (Salmo 23:4) Kon, sa paghatag kanilag pagtagad, iyang makaplagan ang usa ka masakiton o nasamad nga karnero, kini iya tingaling haplasan sa makapahupay nga lana. (Salmo 23:5; Ezekiel 34:4; Zacarias 11:16) Sa kadaghanang kaso ang manggibuhaton nga magbalantay nga nagbutang sa iyang kasingkasing nganha sa iyang mga panon makakita nga ang iyang paningkamot mopatunghag mga bunga—ang inanay nga pagdaghan sa iyang panon.
Ang usa ka manggibuhaton ug mainampingon nga magbalantay may kasaligan nga tinubdan sa tabang—si Jehova. Sa unsang paagi naingon? Aw, ang Diyos nagatagana sa mga panahon ug mga siklo nga kasagarang mosangpot sa igo nga kabalilihan nga makabuhi sa panon. (Salmo 145:16) Sa diha nga, tungod sa kausaban sa panahon, ang lunhaw nga balili mawala gikan sa patag nga mga dapit, kini tingali daghan sa haboghabog nga mga dapit, diin ikabalhin sa usa ka matinagdanong magbalantay ang iyang mga hayop.
Ang Proverbio 27:26, 27 naghisgot sa usa ka bunga sa maong paghago—pagkaon ug sapot. Tinuod, ang kahubitan dili maoy bahin sa hingapin sayon nga mga pagkaon o sa mga kinaham sa batid sa pagkaon, ni nagahatag kini sa usa ka mamumuo ug hinungdan sa pagdahom sa sapot sa kinabag-ohang urog o pinakamaayong panapton. Apan kon siya andam sa paghago, ang magbalantay ug ang iyang pamilya makabaton gikan sa kahayopan ug gatas (ug sa ingon keso), ingon man sa balhibo sa karnero aron sa paghabol sa lig-ong mga panapot.
Busa ang tambag: “Angay nga makaila ka sa tino sa dagway sa imong panon” maoy dili sa panguna alang sa espirituwal nga mga magbalantay; kini maoy alang sa tanang Kristohanon. Gipasiugda niini ang bili sa atong pagkatagbaw sa pagkaon ug panapot nga mabatonan pinaagi sa makanunayon, makugihong buhat, nga magasalig nga kita dili pasagdan sa Diyos. (Salmo 37:25; 2 Tesalonica 3:8, 12; Hebreohanon 13:5) Sa pagtandi sa Proverbio 27:23-27 sa tambag sa Lucas 12:15-21 ug 1 Timoteo 6:6-11, atong makita nga wala mabalhin ang tambag sa Diyos bahin niini. Busa ang matag usa kanato makabasa pag-usab sa Proverbio 27:23-27, nga mangutana sa atong kaugalingon, ‘Gibutang ba nako kini sa kasingkasing ug gipadapat sa akong matag-adlaw nga kinabuhi?’
[Picture Credit Line sa panid 31]
Pictorial Archive (Near Eastern History) Est.