Sunog Nakapukaw ug Programa sa Pagtukod
“SUNOG! Sunog! Ang Assembly Hall sa mga Saksi ni Jehova nasunog!” Kanang nakakurat nga singgit milanog sa usa ka hapon sa Biyernes sa Oktubre 1989 sa Heerenveen, usa ka lungsod sa amihanang rehiyon sa Netherlands.
Ang mga Saksi ni Jehova nakagamit niining maayong Assembly Hall sulod sa 11 ka tuig. Halos kada hinapos sa semana, gatos-gatos ang nagatigom dinhi alang sa duha ka adlaw nga sirkitong asembliya o sa usa ka adlaw nga special assembly. Kadto maoy usa ka haruhay nga dapit alang sa pagtudlo sa Bibliya.
Usa ka aksidente nahitabo samtang gitrabaho ang atop sa tigomanan. Mga gutlo lamang, naabo niining aksidenteha ang tigomanan. Apan, maayo na lang kay walay nasamdan.
Nasubo sa kapildihan ugaling wala mawad-ig paglaom, ang mga Saksi ni Jehova nagplano ug usa ka bag-ong tigomanan sa laing lokasyon. Sila nakakitag usa ka maayong dapit diha sa Swifterbant, sa lalawigan sa Flevoland. Kini maoy usa ka dakong dagat niadto nga giabunohan ug yuta sa kanhi interyor nga Zuider Zee, nga 5 metros ubos sa lebel sa dagat.
Sa pagka Enero 1991 gipahibalo nga sugdan na ang pagtukod sa bag-ong Assembly Hall. Kini tukoron sa Mayo ug Septiyembre 1991. Ginatos ka mga Saksi ang mibolunter sa pagtrabaho diha sa lugar, ug nakita sa pipila ka batan-ong mga lalaki ang proyekto nga usa kini ka tikanganan sa pag-alagad kang Jehova nga Diyos sa bug-os-panahon. Daghang trabahante miabot gikan sa Belgium ug Inglaterra.
Busa usa ka matahom nga pagkadesinyong edipisyo ang natukod. Ang awditoryom niini ug kapeteriya nabulag sa usa ka bildog-atop nga pasilyo. Ang pangunang tigomanan makapalingkod ug 1,008 ka tawo, ug laing 230 ang makatan-aw sa programa diha sa mga iskren sa telebisyon diha sa tapad nga tigomanan.
Karon, libolibo ang nagaingon: ‘Umari kamo, manungas kita sa bukid ni Jehova, ug kita iyang pagatudloan sa iyang mga dalan.’ (Isaias 2:2, 3) Kining bag-ong Assembly Hall maoy usa lamang sa daghang dapit diin ang maong espirituwal nga instruksiyon ginahatag. Ang lokal nga Kingdom Hall sa mga Saksi ni Jehova maoy laing dapit. Didto ikaw makakaplag ug mainitong pag-abiabi.