Sila Nangabot Bisan pa sa Kalisdanan ug Kapeligrohan
ANG petsa Enero 2, 1992. Ang dapit—Maxixe, Inhambane nga Probinsiya. Ang Aprikanhong kasikas-sa-kagabhion sa Mozambique sa kalit nabalda sa dihang gipatokar ang radyo. “Ang mga Saksi ni Jehova nagahimo sa ilang ‘Mahigugmaon sa Kagawasan’ nga Kombensiyon dinhi sa atong probinsiya,” ang pahayag sa magsisibya. “Ang ilang katuyoan mao ang pagtudlo sa katawhan kon sa unsang paagi mahimong makaplagan ang tinuod nga kagawasan sa karong kalibotan. Ang tanan giabiabi sa pagtambong.”
Didto sa halayong suok sa Aprika, ang kasaysayan ginahimo! Sa unang higayon, ang distritong kombensiyon sa mga Saksi ni Jehova gihimo, ug 1,024 ka tawo ang atua didto sa pagtagamtam niana. Pipila ka tuig sa miagi, ang samang hitabo dili gayod mahimo nga dayag kaayo sa Mozambique, sanglit ang buluhaton sa mga Saksi ni Jehova kaniadto ilalom sa pagdili. Gusto ba nimong makadungog sa maisogong mga pagsakripisyo nga gihimo sa pagtambong niining kombensiyona?
Ang Probinsiya sa Inhambane, kaamgid sa daghang ubang mga bahin sa Aprika, maoy nindot kaayo. Ang samag-dhow nga mga sakayan-pangisda nga may trayanggulo nga mga layag nagatabas sa dagat layolayo sa iyang baybayon. Daghan ang mga kalubihan. Apan usa ka kadaotan nga motugaw sa hunahuna nagsingabot diha sa kabanikanhan: ang giyera sibil!
Alang nilang nangatulog diha sa payag nga gama sa lukay sa sayong mga oras sa buntag, dili katingad-an ang makamata tungod sa daguhob sa boom-boom-boom sa dagkong mga kanyon sa kasikbit nga mga baryo samtang ang gubat sa kalasangan nagsilaob sa tibuok gabii. Sagad ang inosente nga mga lungsoranon ang nagaantos. Usahay mga kabataan makita nga nagakimpang tungod sa nawala o naputol nga mga tiil. Ngani pila sa mga Saksi ni Jehova may mga uwat sa ilang mga nawong ug kalawasan gikan sa kapintasan nga ilang naagoman.
Ubos niining mga kahimtanga ang “Mahigugmaon sa Kagawasan” nga Kombensiyon gipabilhan ug halalom sa tanang nanambong. Way sapayan sa kalagmitan sa mga pagbanhig sa dalan padulong sa kombensiyon, daghang grupo sa mga pamilya gikan sa banikanhong mga dapit determinado sa pag-adto. Ang pag-adto didto dili usab sayon, sanglit ang publikong transportasyon sa kadaghanan atua sa likod sa dako, walay atop nga mga trak. Usahay kutob sa 400 ka mga pasahero maghuot sa usa ka trak! Ubay-ubay niining mga trak maglinya sa pagporma ug komboy nga giubanan sa armado nga mga bantay militar.
Si Nora ug iyang tulo ka batang babaye, nga nag-edad ug usa, tulo, ug unom, maoy usa ka pamilya nga nagriyesgo sa ilang mga kinabuhi pinaagi sa pagbiyahe nianang paagiha. Siya nakatigom sulod sa mga bulan sa abante aron makaarang sa biyahe. Ang kamatuoran nga walay seguradong kasak-an sa kombensiyon wala makapugong kaniya. Kauban sa daghan pa, si Nora ug iyang pamilya yanong nagluto, nagkaon, ug natulog sa walay atop nga luna diha mismo sa dapit sa asembliya.
Ang mapintas tropikonhong kainit nga sundan sa bunok nga ulan wala gani makapakunhod sa walay pugong nga kangaya sa mga igsoon nga nagtagamtam sa espirituwal nga piyesta. Sila mibati nga walay molabaw ka importante alang kanila kaysa atua didto sa kombensiyon. Ang nagsimbolo sa ilang dedikasyon diha sa dagaang nga katubigan sa Dagat Indian maoy 17 ka tawo. Samtang gihimo ang pagbawtismo, ang dakong panon sa malipayong tumatan-aw kinaiyanhong nadasig sa pag-awit ug mga pagdayeg kang Jehova.
Kining pundok sa mga magsisimba nakadiskobre sa pagkatinuod kon unsay kahulogan nga mahimong mga mahigugmaon sa diyosnong kagawasan. Si Hans, usa ka hawas gikan sa kabisera, sa Maputo, miingon: “Kami bag-o pang nakakita sa sinugdanan sa usa ka bag-ong yugto sa buluhaton sa mga Saksi ni Jehova dinhing dapita sa Aprika.”