“Ang Asawa sa Imong Pagkabatan-on”

“ANG panapaw halos nahisamag adlaw-adlaw nga panghitabo.” Kanay gisulti sa daghang eksperto, sumala sa Los Angeles Times. Matingala ka ba sa maong pahayag? Ugaling, ang sikyatristang si Frank Pittman nagkalkulo nga duolan ug 50 porsiento sa mga bana ug gikan sa 30 porsiento ngadto 40 porsiento sa mga asawa nagmaluibon. Kon kana tinuod, hapit katunga sa tanan nga minyo nakapanapaw!

Nagkahulogan ba kanang ang imoralidad maayo ra? Dili gayod! Ang pagkakanat sa pagluib wala maghimo niana nga matarong​—sama ra nga ang pag-usbaw sa krimen diha sa kadalanan nagahimong matarong sa pagtulis sa usa ka tawo. Ang imoralidad makadaot. Pananglitan, ang katawhan karong adlawa gitakboyan sa malukpanon peligrosong mga sakit nga gipasa sa seksuwal nga paagi nga kanang tanan dali untang makontrolar kon ang katawhan maayo pa untag kagawian. Ang mopatay nga sakit nga AIDS dili unta makauswag kon ang katawhan dili pa lugak kaayo sa ilang seksuwal nga mga kinabuhi.

Gawas pa, bisan ang labing sosyal ug “nalamdagan” mobatig dako kaayong kaguol sa diha nga luiban sa ilang mga kapikas. Usa ka buhat sa pagluib makapahinabo ug mga samad nga gikinahanglan ang taas kaayong panahon sa pag-alim.

Hinuon, ang labing hinungdanon mao nga ang dili pag-isip nga ugdang sa mga panumpa sa kaminyoon maoy dakong kawalay-tahod sa Diyos, sanglit siya ang Awtor sa kaminyoon. Ang Bibliya nagaingon: “Pasagdi nga ang kaminyoon mahimong dungganon sa tanan.” Kita gipasidan-an usab: “Ang Diyos magahukom sa mga makihilawason ug mga mananapaw.”​—Hebreohanon 13:4.

Busa, ang mga tawong maalamon nagapamati sa dinasig nga mga pulong: “Magkalipay uban sa asawa sa imong pagkabatan-on.” (Proverbio 5:18) Sila nagatinguhag katagbawan ug kalipay uban sa ilang mga kapikas sa kaminyoon. Sa pagbuhat niana gibantayan nila ang ilang lawasnon ug emosyonal nga kahimsog, ug labing hinungdanon, gipasidunggan nila ang dakong Awtor sa kaminyoon, si Jehova nga Diyos.