Nakahinumdom Ka Ba?

Nalingaw ka ba sa pagbasa sa dili pa dugayng mga isyu sa Ang Bantayanang Torre? Kon mao, ikaw sa walay duhaduha maikag sa paghinumdom sa mosunod:

▫ Unsang makapakombinsir nga pamatuod ang gihatag sa nagkalainlaing mga paglihok sa balaang espiritu sa unang siglo? Kini nga mga paglihok maoy makitang pamatuod nga ang Diyos wala na mogamit sa 1,500 anyos nga kongregasyon sa Israel ingong iyang linaing katawhan, apan ang iyang pag-uyon karon anaa na sa bag-ong Kristohanong kongregasyon, nga gitukod sa iyang bugtong Anak. (Itandi ang Hebreohanon 2:2-4.)​—8/15, panid 5.

▫ Unsay mga hinungdan sa talagsaong pag-uswag nga nasinati sa mga Saksi ni Jehova? Una, kini maoy tungod sa panalangin sa Diyos. Kini maoy buluhaton sa Diyos. Ang ginatudlo sa mga Saksi ni Jehova diha sa ilang buluhatong pagwali gibase sa Bibliya. Ang laing yawi sa ilang kalamposan mao ang ilang bug-os nga pag-ila kang Kristo Jesus ingong tinudlo nga Ulo sa Kristohanong kongregasyon.​—9/1, panid 19.

▫ Nganong si Jehova nagpakita kang David ug kaluoy maylabot sa iyang dakong sala kang Batseba? Kadto sa panguna maoy tungod sa pakigtugon sa Gingharian nga gihimo sa Diyos uban kang David, apan kadto usab maoy tungod sa pagkamaluloy-on ni David ug sa iyang tim-os nga paghinulsol. (1 Samuel 24:4-7; 2 Samuel 7:12; 12:13; Salmo 51:1, 2, 17)​—9/15, panid 10, 11.

▫ Unsang tulo ka matang sa ebidensiya ang gihatag sa Kristohanong Gregong Kasulatan sa pagpaluyo sa pagka-Mesiyas ni Jesus? Ang kaliwatan ni Jesus maoy unang matang sa ebidensiya. (Mateo 1:1-16; Lucas 3:23-38) Ang laing ebidensiya mao ang natuman nga mga tagna. Sa literal dunay kawhakawhaang mga tagna, sama nianang makita sa Daniel 9:25, nga nagpaila kang Jesus ingong Mesiyas. Ang ikatulong matang sa ebidensiya mao ang pamatuod mismo sa Diyos; gihatag niya kini sa tulo ka okasyon pinaagi sa iyang kaugalingong tingog. (Mateo 17:5; Lucas 3:21, 22; Juan 12:38)​—10/1, panid 10, 12.

▫ Unsay gipasabot ni Jesus sa dihang siya miingon, sumala sa girekord sa Mateo 24:37: “Sama sa mga adlaw ni Noe, maingon usab unya ang presensiya sa Anak sa tawo”? Si Noe nagtukod ug arka ug nagpasidaan sa mga daotan sa tinagpulo ka katuigan una pa sa pag-abot sa Lunop ug naglaglag sa daotang sistema sa kalibotan. Busa, ang dili makitang pagkanaa ni Jesus susamang molungtad sa usa ka yugto sa tinagpulo ka katuigan, nga niining panahona ang tibuok kalibotan nga pamatuod ginahatag, sa dili pa kini mosangko sa usa ka dakong kalaglagan.​—10/1, panid 16.

▫ Unsa ang pipila ka kinahanglanon alang sa usa ka maayong pagtuon sa Bibliya sa pamilya? Kinahanglang gahinag panahon ang pagtuon. Dili gayod nato tugotang mapulihan kini sa TV o sa laing mga kalingawan. Kinahanglang tagdon ang partikular nga mga panginahanglan sa pamilya. Gamit ug nagasusing mga pangutana aron matino nga nakasabot ang mga bata sa ilang ginatun-an. (Mateo 17:25) Himoang tawhay ang atmospera. Magmadasigon, ug ilangkit ang tanan sa pagtuon.​—10/15, panid 17.

▫ Unsa ka mabalak-on ang mga Kristohanon nga ang mga sangkap sa dugo basin gidugang diha sa mga produkto sa pagkaon? Ang mga Kristohanon angay magbantay batok sa pagkabalaka sa yanong posibilidad lamang o hungihong, ug ang pagkamakataronganon gikinahanglan bisan sa pagsusi sa mga marka o sa pagpangutana sa mga matansero. Apan, kon nahibaloan nga ang dugo kaylap nga gigamit sa lokal nga dapit​—kaha sa pagkaon o sa pagtambal​—ang mga Kristohanon kinahanglang mag-amping sa pagsugot sa sugo sa Diyos sa paglikay gikan sa dugo. (Buhat 15:28, 29)​—10/15, panid 30-1.

▫ Sa unsang paagi ang basahon sa mga Proverbio nagpasiugda sa espirituwal nga giladmon sa mga paagi sa pagtudlo nga gigamit sa Israel? Ang basahon sa mga Proverbio nagpakita nga ang katuyoan niini mao ang pagtudlo sa “mga walay kasinatian” sa hamiling mga butang sa kaalam, disiplina, pagsabot, salabotan, panghukom, kaigmat, kahibalo, ug katakos sa panghunahuna​—ngatanan diha “sa pagkahadlok kang Jehova.” (Proverbio 1:1-7; 2:1-14)​—11/1, panid 12.

▫ Unsang timbang nga hunahuna bahin sa edukasyon ang kinahanglang batonan sa mga batan-on karong adlawa? Ang mga Kristohanon kinahanglang mag-isip sa edukasyon ingong usa ka paagi sa pagkab-ot sa gitinguhang resulta. Ang ilang katuyoan niining kataposang mga adlaw mao ang pag-alagad kang Jehova sa labing dako ug labing epektibo nga maarangan diha sa bug-os panahong ministeryo kon sila makahimo.​—11/1, panid 18.

▫ Nganong gipangayoan ni Jehova ang nasod sa Israel sa pagbayad sa ikapulo? Una, aron sila makapakita sa aktuwal nga paagi sa ilang apresasyon sa pagkamaayo ni Jehova. Ikaduha, aron sila makaamot sa pagsuportar sa mga Levihanon, nga sa ingon kahatagan nila ug bug-os nga pagtagad ang ilang mga kaakohan, lakip ang pagtudlo sa Kasugoan. (Tan-awa ang 2 Cronicas 17:7-9.)​—12/1, panid 9.

▫ Unsa ang ikapulo nga gidapit ang mga Kristohanon nga maoy dad-on? (Malakias 3:10) Ang ikapulo nagahawas sa bahin nga atong gipanag-iya nga atong dad-on ngadto kang Jehova o gamiton diha sa iyang pag-alagad. Kini maoy ilhanan sa atong gugma kaniya ug sa atong pag-ila nga kita gipanag-iya niya.​—12/1, panid 15.