“Usa ka Matinumanong Saksi sa Kalangitan”
SA WALA pay tawong mitaak sa yuta, ang bulan dugay nang nagsiga nga masanagon diha sa langit sa kagabhion. Sa usa ka panahon daghan ang misimba niana ingong usa ka diyosa. Ang Gregong awtor nga si Plutarch nangangkon nga kana ang kataposang dulnganan sa putling mga kalag human sa kamatayon. Sa Baltic nga sugilambong ang bulan usa ka lalaki, bana sa adlaw. Nag-away ang magtiayon, ug gibiyaan sa bulan ang iyang asawa, mao nga tagsa rang makita diha sa kalangitan uban sa iyang asawa!
Karong adlawa, ang batan-on—ug hamtong—nga mga naghigugmaay mohangad sa bulan ug maghunahunag romantikong mga handurawan. Niadtong katuigang 1960 ang mga siyentipiko migugol ug dagkong kantidad sa salapi sa pagpadalag tawo sa bulan ug sa pagkuhag pipila ka kilo nga bato aron tukion. Usa ka butang mahitungod sa bulan ang segurado. Kada adlaw, nga walay sipyat sa eskedyul, kana mosubang ug mosalop. Pagkamatinumanon niya sa iyang tinudlong rota nga atong makalkulo ang iyang mga yugto ug mga eklipse mga libolibo ka tuig sa miagi.
Sa dihang ang mga Israelinhon magatan-aw sa bulan, mahinumdom sila sa usa ka butang nga kahibulongan. Ang Diyos misaad nga ang harianong dinastiya ni Haring David dili mahanaw. Siya miingon: “Ingon sa bulan pagalig-onon kini [binhi ni David] sa walay kataposan, ug ingon sa usa ka matinumanong saksi sa kalangitan.” (Salmo 89:35-37) Kining saara natuman kang Jesus, ang “Anak ni David.” (Lucas 18:38) Tapos sa iyang kamatayon si Jesus gibanhaw ingong imortal nga espiritu ug mikayab sa langit. (Buhat 2:34-36) Sa tagal sa panahon siya gipalingkod ingong Hari sa langitnong Gingharian sa Diyos. (Pinadayag 12:10) Kanang Ginghariana sa karon nagamando na ug “molungtad sa walay kataposan.” (Daniel 2:44) Niining paagiha si Jesus, ang imortal nga hawas sa harianong dinastiya ni David, molungtad hangtod anaa ang bulan, ang “matinumanong saksi sa kalangitan.”
Busa, sa matag higayon nga makita nimo ang bulan nga masanagong nagasiga diha sa langit sa kagabhion, hinumdomi ang saad sa Diyos kang David ug magpasalamat nga ang Gingharian sa Diyos sa karon nagamando na ug magamando sa walay kataposan, alang sa himaya sa Diyos ug sa walay kataposang panalangin sa matinumanong katawhan.—Pinadayag 11:15.
[Picture Credit Line sa panid 32]
Frank Zullo