“Ang mga Lirio sa Kaumahan”

KAWALAY-TRABAHO. Nagtaas nga mga prisyo. Kakabos. Ekonomikanhong depresyon. Kining mga pulonga mas subsob makita diha sa mga pamantalaan. Ug kana nagsumbalik-silaw sa kalisdanan nga giatubang sa minilyon samtang gipaninguha nila ang pagpakaon ug pagpabiste sa ilang mga pamilya ug pagtagana kanilag puy-anan.

Ang mga magtutuo ug mga dili-magtutuo managsamang apektado. Apan ang mga magtutuo wala pasagding mag-inusara sa pag-atubang nianang mga sulirana. Si Jesus, sa nakigsulti ngadto sa ubos nga mga tawo sa unang siglo, miingon: “Tan-awa ninyo pag-ayo ang mga langgam sa kalangitan, tungod kay sila wala magpugas ug binhi ni mag-ani ni maghipos ngadto sa mga dapa; apan ginapakaon sila sa inyong langitnong Amahan. Dili ba labaw pa man kamog bili kay kanila?”​—Mateo 6:26.

Si Jesus miingon usab: “Kuhaig pagtulon-an ang mga liryo sa kaumahan, giunsa nila sa pagtubo; wala sila magbudlay, ni magkalinyas; apan suginlan ko kamo nga bisan pa si Solomon sa tibuok niyang katahoman wala gani makabiste maingon sa usa kanila. Kon, karon, gibistehan sa Diyos sa ingon ang mga tanom sa kaumahan, . . . dili ba kamo labaw pa nga iyang pagabistehan?”​—Mateo 6:28-30.

Nagkahulogan ba kini nga ang Kristohanon dili na kinahanglang manarbaho alang sa pangabuhian? Dili gayod! Ang usa ka Kristohanon nagakugi sa pagtrabaho sumala sa gikinahanglan aron makabayad sa iyang mga bayranan. Si apostol Pablo miingon: “Kon adunay dili buot mobuhat, ayaw siya pagpakan-a.” (2 Tesalonica 3:10) Bisan pa niana, ang Kristohanon mahunahunaon sa mahigugmaong pagtagad sa Diyos ug may pagtuo nga ang iyang langitnong Amahan nagabantay kaniya. Sa ingon, siya dili mawad-ag panimbang tungod sa mga kabalaka sa kinabuhi. Bisan sa lisod nga mga panahon, iyang ibutang ang unang mga butang​—espirituwal nga mga butang—​nga una. Siya nagtuo sa mga pulong ni Jesus: “Nan, ipadayon ninyo pagpangita pag-una ang gingharian ug ang iyang pagkamatarong, ug kining tanang ubang butang igadugang ra kaninyo.”​—Mateo 6:33.