Ang Tubig sa Kinabuhi

“SI BISAN kinsang makadungog paingna: ‘Umari ka!’ Ug si bisan kinsang giuhaw paaria; si bisan kinsang buot paimna sa tubig sa kinabuhi nga walay bayad.” (Pinadayag 22:17) “Tubig sa kinabuhi”​—kana nagkahulogan sa tanang tagana sa Diyos alang sa atong kaluwasan nga gipasukad sa halad-lukat ni Jesu-Kristo. Kining mga taganaha mabatonan, ug sila walay bayad. Pagkatalagsaong kamahinatagon sa bahin sa atong Diyos! Apan, nganong sila gisimbolohan sa tubig?

Aw, ang literal nga tubig mopahinabo sa pagtubo sa mga tanom sa yuta, ug kana mopaposible nga mabuhi ang tawo. Kon walay tubig, ang mga tanom, ug sa ingon ang tawhanong kinabuhi, dili molungtad. Dugang pa, ang imong lawas maoy 65 porsientong tubig. Ang pila ka espesyalista sa kahimsog nagsugyot sa padayong paghupot nianang gidaghanona pinaagi sa pag-inom ug 2.4 litros nga tubig sa usa ka adlaw. Ang tanang palakaw sa imong lawas​—gikan sa paghilis ug pagkaon ngadto sa pagpagawas sa hugaw—​nagkinahanglag tubig. Ayaw pag-inom ug tubig sa usa ka semana, ug ikaw mamatay.

Sa susama, ang “tubig sa kinabuhi” mopaposible ug mosustento sa espirituwal nga kinabuhi. Kon isalikway nato ang tubig sa kinabuhi, wala kitay walay-kataposang kaugmaon. (Juan 3:36) Kon dawaton nato kana, maangkon nato ang kinabuhing walay kataposan. Dili ikatingala nga ang babayeng Samarianhon mitubag nga maikagon sa dihang giingnan siya ni Jesus: “Si bisan kinsang moinom sa tubig nga akong igahatag kaniya dili na gayod pagauhawon, apan ang tubig nga akong igahatag kaniya mamahimo diha kaniya nga usa ka tuboran sa tubig nga magaawas sa paghatag ug kinabuhing walay kataposan”! (Juan 4:14) Hinaot nga kita magtinguha uban sa kaikag ug moinom sa tubig sa kinabuhi nga walay bayad.

[Picture Credit Line sa panid 32]

Garo Nalbandian