Mga Pag-abuno sa Dugo Sobra ra ba nga Gitamod?

Ang mga pag-abuno sa dugo komon sa modernong medisina, apan sila ba ingon ka maayo sa ilang dungog? Unsay imong hunahuna?

Diha sa The American Journal of Medicine (Pebrero 1993), si Dr. Craig D. Kitchens nangutana: “Ang mga Pag-abuno Sobra ra ba nga Gitamod?” Siya miingon nga ang mga doktor nagatimbangtimbang pag-ayo kon kaha ang kaayohan sa usa ka pagtambal mas dako kay sa risgo nga ipatungha unya niini. Unsay ikasulti mahitungod sa mga pag-abuno?

Gisubli ni Kitchens ang dili pa dugayng mga ebidensiya sa daghang risgo nga nalangkit sa mga pag-abuno, sama sa hepatitis, pagkadaot sa sistema sa imyunidad, pagkadaot sa sistema sa organo sa lawas, ug sa graft-versus-host nga mga epekto. Usa ka pagtuon nga nagsumaryo “sa daghang komplikasyon” gumikan sa mga pag-abuno sa dugo “mihinapos nga ang matag pag-abuno adunay 20% nga purohan nga mopatunghag pipila ka dili maayong epekto, diin ang uban niini dili kaayo grabe apan ang uban grabe kaayo,” gani makamatay pa.

Ugaling, ang ginaingon ba nga mga kaayohan takos pangarisgohan?

Gisubli ni Dr. Kitchens ang gitahong 16 ka pagtuon nga naglangkit sa 1,404 ka operasyon diha sa mga Saksi ni Jehova, kinsa midumili sa mga pag-abuno ingong pagtuman sa sugo sa Bibliya sa ‘paglikay sa dugo.’​—Buhat 15:28, 29.

Ang resulta? “Ang desisyon sa pasyenteng mga Saksi ni Jehova sa pagdumili sa pag-abuno sa dugo sa dagkong mga paagi sa pag-opera mopatim-aw nga nakadugang ug 0.5% ngadto sa 1.5% ka kamatayon sa katibuk-ang risgo sa operasyon. Dili kaayo tin-aw kon pila ka sakit o kamatayon ang malikayan sa pagdumili sa pag-abuno sa dugo, apan kini lagmit molabaw sa risgo tungod kay wala kaabunohi.” (Italiko amoa.) Ang iyang punto? Ang bisan unsang medikal nga risgo sa pagdumili sa dugo lagmit mas menos kay sa mga risgo nga nalangkit sa pagdawat sa mga pag-abuno sa dugo.

Busa, ang makataronganong pangutana ni Kitchens: “Kon ang pagdumili sa mga Saksi ni Jehova sa pag-abuno sa aktuwal mohatag lamang ug dugang diyutayng sakit ug kamatayon ug malikayan ang dakong gasto ug grabeng mga komplikasyon, angay bang modawat ang mga pasyente ug mas diyutayng mga pag-abuno?”

Kadtong kinsa modumili sa mga pag-abuno tungod sa maong ebidensiya nagalihok usab nga uyon sa mga sugo sa atong Maglalalang.