Masibotong mga Kristohanon sa Britanya

Momenos sa 10 porsiento sa 56 ka milyong tawo sa Britanya ang masibotong mga Kristohanon karong adlawa, sumala sa The Economist. Sa kasagarang Dominggo, ubos pa sa upat ka milyong tawo ang motambong ug mga serbisyo sa simbahan. Niini, 1.1 milyon lang ang mga Anglikano. Hinuon, bisan pa sa kaylap nga agnotisismo o pagduhaduha sa Diyos, ang Church of England nagpadayon sa natukod nga papel niini ingong relihiyon sa Estado. “Ang Britanya dili usa ka Kristohanong sosyedad sulod sa katuigan apan nagdumili sa pag-angkon sa pagduhaduha sa Diyos, sa kinadak-an tungod sa paghandom sa nangaging panahon,” nag-ingon ang samang mantalaan. Dili katingad-an nga ang modernong mga politiko ug mga mantalaan nag-awhag sa pagbungkag sa Iglesya, usa ka pagputol sa Iglesya-Estadong kalambigitan.

“Usa ka kalibotan nga tinuorayng sekular, nga nag-angkong Kristohanon, maoy kinangil-aran sa tanang kalibotan,” miagulo si Walter Bagehot, ika-19 ka siglong editor sa The Economist. Apan sa unang siglo K.P., si Jesu-Kristo nag-ingon nga ang iyang mga tinun-an ‘dili bahin sa kalibotan, sama nga siya dili bahin sa kalibotan.’ (Juan 17:16) Hinunoa, gipadala niya sila sa kalibotan aron sa pagsangyaw sa Gingharian sa Diyos. Sa susama karong adlawa, ang mga Saksi ni Jehova sa tibuok kalibotan ilado kaayo tungod sa masibotong pagsangyaw “sa publiko ug gikan sa balay ngadto sa balay.”​—Buhat 20:20.

Kon itandi sa mga Anglikano, ang 126,173 ka Saksi sa Britanya diyutay ra. Apan sila nagagugol ug mga 20 ka oras matag bulan sa pagtambong sa Kristohanong mga tigom. Dugang pa, sulod sa 1992 ang matag Saksi migugol ug aberids nga 16 ka dugang oras matag bulan sa pagwali ngadto sa uban sa maayong balita sa Gingharian sa Diyos, ang gobyerno nga sa dili-madugay magtukod ug matarong nga bag-ong kalibotan. (Mateo 24:14; 2 Pedro 3:13) Sa sunod panahon nga moduaw ang mga Saksi ni Jehova sa inyong balay, mahimo bang patalinghogan ninyo ang ilang linaing mensahe ug diskobrehon kon unsay nagtukmod sa ilang kasibot?