Sama sa Usa ka Kahoy

“ANG mga balak gihimo sa mga buang sama kanako, apan Diyos lamang ang makahimo sa kahoy.” Nga nagdayeg sa daghang hiyas sa kahoy, ang magbabalak nga si Joyce Kilmer sa ingon naghatag sa Diyos sa pasidungog tungod sa paglalang kanila.

Si Jehova nga Diyos naghimo ug mga kahoy sa daghang matang, katahom, ug kamapuslanon. Ang managsamang gagmay ug dagko kaayong mga kahoy, matahom kaayo nga sila dili mabatbat. Dugang pa, ang mga kahoy nagtaganag kalan-on, sugnod, ug puy-anan. Ug ang mga tigdesinyo padayong nakakaplag ug bag-ong mga kagamitan sa kahoy.

Diha sa Bibliya, ang mga kahoy usahay mahulagwayong gigamit sa paghawas sa mga gingharian, mga magmamando, ug mga tawo. (Ezekiel 31:1-18; Daniel 4:10-26) Ang mga kahoy gihisgotan maylabot sa malipayon, malinawon, ug mabungahong mga kahimtang nga mosangpot gumikan sa pagkahari ni Jehova ug sa kapasig-ulian sa iyang katawhan. (1 Cronicas 16:33; Isaias 55:12; Ezekiel 34:27; 36:30) Ang Kasulatan nagsaad usab nga ang mga adlaw sa katawhan sa Diyos mahisama nianang iya sa kahoy. (Isaias 65:22) Kini adunay dakong kahulogan sa dihang mahibaloan nato nga ang pila ka kahoy mabuhi sa kasiglohan.

Usa ka salmista sa Bibliya nag-ingon nga ang usa ka tawo nga nagakalipay sa kasugoan sa Diyos “mahisama gayod sa usa ka kahoy nga natanom sa daplin sa kasapaan sa tubig, nga naghatag sa bunga niini sa iyang panahon ug ang mga dahon niini dili malaya, ug ang tanan nga iyang buhaton magmalamposon.” Ang usa ka malabong nga kahoy nga gitanom sa daplin sa dagayang tuboran sa tubig nagpahinumdom sa salmista sa espirituwal nga kauswagan nga napahimuslan sa usa kansang “kalipay anaa sa kasugoan ni Jehova.” (Salmo 1:1-3) Kon ikaw may tinuod nga kalipay sa kasugoan ug sa Sagradong Pulong sa Diyos, ang imong mga adlaw mahisama nianang iya sa kahoy. Sa pagkamatuod, pinaagi sa paglihok nga kaharmoniya sa tukmang kahibalo kang Jehova nga Diyos ug kang Jesu-Kristo, ikaw makadawat ug paglaom sa kinabuhing walay kataposan.​—Juan 17:3.