Moadto ba sa Langit o sa Impiyerno?
“UNSAY imong mga posibilidad sa pag-adto sa langit o sa pag-adto sa impiyerno?”
Sa paninugdan, mao kanay gipangutana sa usa ka seksiyon sa mga Amerikano sa dili pa dugay nga surbi. Gipatik sa Princeton Religion Research Center ang mga resulta diha sa Religion in America 1992-1993.
Unsa man kahay imong tubag? Unsay mga posibilidad sa imong kapikas o ubang mga minahal sa pag-adto sa langit inigkamatay? Nagtuo ka ba nga posible nga ikaw, o sila, sa kataposan moadto sa impiyerno?
Ang surbi nagpakita nga 78 porsiento nagtuo nga ang ilang mga posibilidad sa pag-adto sa langit maayo o ekselente, mas daghan ang mitubag nianang paagiha sa mga 40 ka tuig sa miagi. Impiyerno? Mga 77 porsiento miingon nga gamay ra ang posibilidad nga makaadto didto.
Ang ila bang mga tubag gipasukad sa tukmang kahibalo sa Bibliya? Aw, mga 4 gikan sa 10 miadmiter nga dili na sama kasubsob kaniadto ang ilang pagtambong ug relihiyosong mga serbisyo kay sa lima ka tuig nga milabay. Bayente-otso porsiento lamang ang nag-angkon nga nakigbahin sa mga grupo sa pagtuon sa Bibliya ug 27 porsiento sa mga klase sa relihiyosong edukasyon.
Kon tun-an nimog maayo ang Bibliya, makaplagan nimo ang pipila ka makakurat nga kamatuoran. Pananglitan, ang Bibliya klaro nga nag-ingon nga sa dihang namatay si Jesus miadto sa “impiyerno,” ingon sa gihubad sa pipila ka bersiyon sa Bibliya. (Buhat 2:31, King James Version, “Hades,” New World Translation) Ang Pulong sa Diyos nagpamatuod usab nga si Haring David ug si Juan Bawtista wala moadto sa langit dihang namatay. (Mateo 11:11; Buhat 2:29) Kadto maoy mga kamatuoran, dili yanong mga opinyon gikan sa usa ka relihiyosong surbi.
Laing mga kamatuoran nga tingali makaapektar kanimo: Ang Bibliya nagtudlo nga ang mga aspotoles ni Jesus ug ang limitadong gidaghanon sa uban pagadalhon ngadto sa langit aron magmando uban kang Jesus. Hinunoa, ang kadaghanan sa katawhan nga nangamatay yanong miadto sa komong lubnganan sa katawhan. Pagabanhawon sila sa Diyos, bangonon sila ngadto sa kinabuhi diha sa yuta nga adunay palaaboton nga usa ka tugob, malipayon, walay pagkatapos nga kinabuhi diha sa usa ka napasig-uli yutan-ong paraiso.
Ang mga Saksi ni Jehova malipay sa pagtabang kanimo sa pagpamatuod gikan sa imong kaugalingong Bibliya sa kasaligang basehanan alang sa maong paglaom.