Usa ka Gabii sa Paghandom

A USA ka halandumong adlaw kapin sa 3,500 ka tuig kanhi, gisugo ni Jehova nga Diyos ang naulipong mga Israelinhon sa Ehipto sa pag-ihaw ug nating karnero ug iwisik ang dugo niini diha sa mga haligi ug sa mga balabag sa pultahan sa ilang mga balay. Niadtong gabhiona mismo, ang manulonda sa Diyos milabay ibabaw sa mga balay nga gitiman-an niining paagiha apan gipatay ang kamagulangang mga anak nga lalaki sa mga panimalay sa tanang mga Ehiptohanon. Dayon ang mga Israelinhon gipagawas. Sukad niadto, sa kasumaran sa maong hitabo, ang mga Hudiyo nagasaulog sa Paskuwa.

Dihadiha human natapos ni Jesu-Kristo ang pagsaulog sa iyang kataposang Paskuwa uban sa iyang mga apostoles, iyang gisugdan ang usa ka panihapon nga magahandom sa iyang haladnong kamatayon. Iyang gitunolan ang iyang matinumanong mga apostoles ug tinapay ug miingon: “Pagkuha kamo, kaon. Kini nagakahulogan sa akong lawas.” Unya iyang gihatagan sila ug usa ka kopa sa bino ug miingon: “Uminom gikan niini, kamong tanan; kay kini nagakahulogan sa akong ‘dugo sa kasabotan,’ nga igabubo alang sa daghan sa kapasayloan sa mga sala.” Si Jesus miingon usab: “Padayong buhata kini sa paghandom kanako.” (Mateo 26:26-28; Lucas 22:19, 20) Busa gisugo ni Jesus ang iyang mga sumusunod sa paghimo niining kasaulogan sa iyang kamatayon.

Ang mga Saksi ni Jehova tim-os nga nagadapit kanimo sa pagduyog kanila sa pagsaulog sa Memoryal sa kamatayon ni Jesus. Ikaw makatambong sa Kingdom Hall nga labing duol sa imong balay. Pakigsusi sa mga Saksi sa imong dapit alang sa eksaktong oras ug dapit. Ang petsa alang niini nga kasaulogan sa 1994 maoy Sabado, Marso 26, ang tinapay ug bino idulot human sa pagsalop sa adlaw.