Mga Magmamantala sa Gingharian Nagtaho
Gisunod Niya ang Iyang Nabansay-sa-Bibliyang Konsensiya
ANG hari sa Israel nga si David miampo kang Jehova alang sa tabang sa dihang siya miingon: “Alang kanako, sa akong integridad ako magalakaw. Oh luwasa ako ug pakitai ako ug pag-uyon.” (Salmo 26:11) Ang Diyos nag-uyon gayod kaniya tungod sa paghupot sa iyang integridad. Si Jehova nagpanalangin usab kang Jesus tungod kay iyang gibuhat ang kabubut-on sa iyang langitnong Amahan, ug Siya nagpanalangin sa usa ka batan-on sa Colombia kinsa nagsunod sa iyang nabansay-sa-Bibliyang konsensiya ug determinadong mobuhat sa kabubut-on sa Diyos. Kining batan-ong lalaki miasoy:
“Sa dihang nagsugod ako sa pagtuon sa Bibliya uban sa mga Saksi ni Jehova, ako usa ka estudyante sa usa ka tunghaan sa Katoliko. Apan, ang akong konsensiya naghasol kanako sa dihang motambong ako sa Misa, busa miadto ako sa prinsipal sa tunghaan (kinsa usa ka pari), sa magtatambag, ug sa tigbantay sa akong pundok ug mihangyo nga dili pugson sa pagtambong sa Misa. Bisan tuod wala ako pugsa, ang pila ka tawo naningkamot sa pagpugos kanako nga motambong. Ang pagpit-os misamot human gayod sa akong bawtismo ingong usa sa mga Saksi ni Jehova. Ang akong papa naghulga kanako nga palayason ko sa balay kon ako mapalagpot gikan sa tunghaan. Ang iyang plano mao ang usa ka edukasyon sa unibersidad ug usa ka propesyonal nga karera alang kanako.
“Ang prinsipal naghatag ug sublisubling mga pasidaan bahin kang bisan kinsa nga mapakyas sa pagtuman sa mga obligasyon sa Katoliko. Sa dihang miabot ang panahon alang sa unang Misa sa tuig, mitago ako hangtod kana natapos. Unya gihatagan nako ang magtutudlo (usa ka pari) ug kopya sa brosyur nga School and Jehovah’s Witnesses ug giingnan siya nga ingong usa sa mga Saksi ni Jehova, dili ako makatambong sa Misa. Siya miingon: ‘Maayong mangita ka na ug laing tunghaan.’ Nasayod ako nga ang pagkamapalagpot sa tunghaan magkahulogan nga palayason ako sa akong amahan gikan sa akong balay. Bisan pa niana, miampo ako kang Jehova ug padayong naghatag ug bug-os nga pamatuod ngadto sa akong mga eskolmet.
“Miabot ang panahon sa bakasyon. Unya, balik sa tunghaan human sa bakasyon, panahon na usab alang sa Misa. Ang prinsipal ug ang ubang mga pari didto sa atubangan sa kapilya, nga andam na sa pagpamati sa mga kompisal. Hapit akong madaog sa kahadlok. Misulod ako ug milingkod, apan ang akong konsensiya naghasol kanako. Sa dihang misugod ang pag-awit, ako naghunahuna, ‘Unsay akong gibuhat dinhi? Si Jehova ang akong Diyos. Dili ako mahimong magtinalawan ug luiban siya. Dili ko siya mahimong biyaan. Dili siya mobiya kanako.’ Miampo ako alang sa kaisog. Unya, migula ako sa kapilya ug mibarog sa linya sa mangompisal. Sa dihang duol na ako sa prinsipal, ako siyang giingnan: ‘Magtutudlo, dili ako mangompisal.’ Siya miingon: ‘Mao kanay akong gihunahuna.’ Ako siyang giingnan nga andam akong moantos sa mga sangpotanan apan ang akong konsensiya dili motugot kanako nga moapil sa Misa. Dili ako makasupak sa mga butang nga akong nakat-onan sa Bibliya.
“Mitutok siya kanako, mipahiyom, ug miingon: ‘Gidayeg ko ikaw. Kamong tanang Saksi takos sa pagdayeg. Alang kaninyo, ang Diyos maoy una, ug kamo andam nga motuman sa iyang mga balaod bisan unsa pa ang mahitabo. Padayona kana sa pagbuhat. Maayo kaayo ang imong gibuhat. Nanghinaot ako nga ang tanang Katoliko sama kanimo, nga nagpakita ug ingong kasibot, ingong gugma sa Diyos. Gikan karon, dili ka na pugson sa pag-apil sa among relihiyosong mga kalihokan.’ Pagkamalipayon nako! Si Jehova nagpanalangin sa akong determinasyon nga motuman sa akong nabansay-sa-Bibliya nga konsensiya.
“Sa sunod nga adlaw ang prinsipal miingon sa mga estudyante: ‘Ang ubang mga relihiyon nag-una kanato. Nganong dili man kita sama kanila, masiboton, nga adunay lalom nga gugma sa Diyos ug tinguha nga moalagad kaniya labaw sa ubang butang? Kini maoy usa ka butang nga kinahanglang maanaa sa atong kasingkasing.’
“Sa kataposan ang prinsipal nabalhin sa Roma, ug ang bag-ong prinsipal wala lang manumbaling sa akong dili-pag-apil. Ang akong papa mipahawa sa balay, nga nagahimo kanakong libre nga mokab-ot sa akong tumong sa bug-os-panahong ministeryo human sa graduwasyon.”
Si Jehova nagpanalangin niining batan-ona kinsa nagsunod sa iyang nabansay-sa-Bibliyang konsensiya. Siya magapanalangin usab niadtong tanan nga maningkamot sa pagbuhat sa iyang kabubut-on.—Proverbio 3:5, 6.