“Gipanalipdan Ako sa mga Saksi ni Jehova!”

NIINING kataposang mga adlaw, napamatud-an sa daghan ang ilang kaugalingon nga mga “mabangis, walay-gugma sa maayo.” (2 Timoteo 3:1, 3) Si Isaac, usa ka boluntaryong ministro sa usa ka sangang buhatan sa Watch Tower Society sa Kasadpang Aprika, nakakaplag niini nga tinuod. Siya miasoy:

“Niadtong Enero 1992, nagbiyahe ako sa usa ka mingaw nga karsada sakay sa usa ka taksi uban sa laing lima ka pasahero. Misugod ako sa pagpakig-estorya sa dalaga nga tapad nako, ug malipayon niyang gidawat ang pinasukad-sa-Bibliya nga brosyur gikan kanako.

“Sa kalit lang, sa mga alas kuwatro sa hapon, usa ka bag-ong kotse nga walay plaka sa lisensiya mibabag sa among atubangan, ug miigot ang among kotse sa paghunong. Tulo ka dagkong mga lalaki, kada usa may riple, migula sa laing kotse ug giablihan ang among mga pultahan. ‘Gawas, gawas kamong tanan,’ misinggit ang usa kanila.

“Gilabni sa laing lalaki ang akong bag sa libro. Sa dihang iyang nakita nga literatura lamang sa Bibliya ang unod niini, gilabog niya ang bag. ‘Unsa pay anaa nimo?’ siya nangutana, nga nagtion sa iyang posil kanako. Dalidali nakong gihatag ang kuwarta sa akong pitaka. ‘Mao ra ni?’ nangutana siya. Giingnan ko siya nga usa ako sa mga Saksi ni Jehova ug nga ang mga Saksi dili mamakak. Iyang gilabnot ang akong pitaka, nakita ang akong identification card sa Watch Tower ug dayon miingon, ‘Ok, Watchtower. Paghulat dinhi.’

“Sunod, miliso siya sa dalaga nga akong nakaestorya sa taksi. Dalidali niyang gikuha ang iyang kuwentas ug gihatag kaniya ang salapi diha sa iyang pitaka. Sa dihang nakit-an sa tulisan ang brosyur sa nangurog niyang kamot, nagtuo siya nga magkauban kami, ug busa iyang gisinyasan siya sa pagtapad kanako.

“Kasamtangan, ang ubang armadong mga bandido mabangis nga miatake sa among kaubang mga biyahero. Ilang gikulata ug gikawatan ang drayber ug ang laing lalaki nga nagbiyahe kauban namo. Gilabni sa usa ka kawatan ang kuwentas sa ikaduhang babaye. Sa dihang siya misukol, mapintason nilang gimakmak siya sa ulo ug dughan ginamit ang pul-an sa riple hangtod namatay. Ang ikatulong babaye ilang gibira gikan sa sakyanan ug giposil sa dughan. Ikasubo, siya usab namatay. Ako lamang ug ang dalaga sa akong tapad ang nabilin nga wala gayod maunsa.

“Sa dihang sa ulahi gipasakay kami sa usa ka milabayng motorista, ang nalisang nga babaye nagsigeg sulti, ‘Gipanalipdan ako sa mga Saksi ni Jehova!’”