Mga Sinulat nga may Linaing Kahulogan
“IEHOVA SIT TIBI CUSTOS”
KINING mga pulonga gisulat diha sa atubangan nga paril sa ika-17ng siglo nga balay sa Celerina, sidlakan sa Switzerland, nga nagkahulogang “Himoang imong panalipod si Jehova.” Niining bukiron nga dapit, sagad nga makita ang ngalan sa Diyos nga gikulit o gipintal diha sa kasiglohan-nag-edad nga mga balay, mga simbahan, ug mga kombento. Sa unsang paagi ang ngalang Jehova nabantog pag-ayo?
Ang karaang Rhaetia (nga nagalangkob sa mga bahin sa karong habagatan-sidlakang Alemanya, Austria, ug sidlakang Switzerland) nahimong usa ka Romanong lalawigan sa 15 W.K.P. Ang mga molupyo nagasultig Romansh, usa ka binase-sa-Latin nga pinulongan nga naugmad ngadto sa daghang diyalekto nga gigamit gihapon diha sa pipila ka walog sa Alpine sa Switzerland ug sa amihanang Italya.
Sa ulahi, ang mga bahin sa Bibliya gihubad ngadto sa Romansh. Usa ka edisyon, ang Biblia Pitschna, naundan sa Salmo ug sa Kristohanon Gregong Kasulatan. Niini nga Bibliya, nga gipatik niadtong 1666, ang ngalang Iehova makita sa daghang higayon sa tibuok Salmo. Sanglit ang Bibliya mao ang pangunang balasahon sa balay, ang mga magbabasa sa Biblia Pitschna pamilyar sa ngalan sa Maglalalang.
Ugaling, ang nagsunod nga mga kaliwatan nawad-ag interes sa mga butang bahin sa Bibliya. Daghan ang wala manumbaling sa pagpangutana kon unsay kahulogan sa pulong “Iehova,” ni ang mga klero naghimog bisan unsang paningkamot sa pagpatin-aw niana. Busa, kini nga mga sinulat nahimong mga dayandayan lamang nga maoy kinaiyahan sa usa ka panahong miagi.
Sa dili pa dugayng mga dekada usa ka talagsaong kausaban sa pagsabot ang nahitabo. Ang mga Saksi ni Jehova sa kapatagan nanungas dinhi, namakasyon niining matahom nga mga walog ug naningkamot sa pagtudlo sa mga molupyo bahin sa Diyos kansang ngalan mao si Jehova. Ang pipila ka Saksi namuyo sa maong dapit aron makagugol sila ug mas daghang panahon sa pagpakigsulti sa mga tawo mahitungod sa kahibulongang mga katuyoan sa Maglalalang alang sa yuta ug alang sa tawo. Busa, kining karaang Romansh nga mga sinulat nahimong makahuloganon niining mga tawhana samtang sila nagpakakat-on mahitungod sa matuod nga Diyos, si Jehova.
[Mga hulagway sa panid 32]
IEHOVA PORTIO MEA: Si Jehova mao ang akong bahin.—Tan-awa ang Salmo 119:57