‘Ayawg Kasubo Ingon sa Uban’
NAKAMATIKOD ka ba sa usa ka bulak nga daw nagluyloy human sa makusog nga bagyo? Sa usa ka paagi kini mahimong makapatandog nga tan-awon. Ngani, ang kalit nga pagbunok sa ulan malagmit magpakaratil sa dimaihap nga mga hayop ug mga tawo—nga mas kusgan nga mga linalang kay sa bisan unsang bulak—sa pagpangitag kapasilongan. Bisan pa, ang bulak nagbarog didto, nga wala maluka ang gamot, nga giatubang ang bug-os nga kasuko sa panahon. Karon, ania kini wala maunsa, nagluyloy apan wala mabali, nga nagpakitag kalig-on nga lahi sa huyang nga dagway niini. Mahibulong ka tingali, samtang nagtan-aw ka niini, kon mapasig-uli pa kaha niini ang kalig-on ug makahangad pag-usab sa maanindot nga ulo niini sa langit.
Ingon niini ang mga tawo. Niining magubot nga mga panahon, nagaatubang kita sa tanang matang sa mga bagyo. Ang mga kalisod sa ekonomiya, depresyon, nagakaluyang panglawas, ang pagkamatay sa usa ka minahal—ang maong mga bagyo sa kalisod moatake sa tanan kanato sa usa ka panahon o sa lain, ug usahay kita dili gayod makalikay niini sama sa bulak nga dili makaluka sa gamot niini ug makapangitag kapasilongan. Makapatandog gayod ang pagkakitag mga tawo nga mahuyang tan-awon nga nagapakitag katingalahang kalig-on ug nakalahutay sa maong mga pag-atake. Sa unsang paagi gibuhat nila kana? Sagad ang yawi mao ang pagtuo. Ang igsoong lalaki ni Jesu-Kristo sa inahan nga si Santiago misulat: “Kamo nahibalo nga kon ang inyong pagtuo molampos sa pag-atubang sa maong mga pagsulay, ang resulta mao ang katakos sa paglahutay.”—Santiago 1:3, Today’s English Version.
Ang laing yawi mao ang paglaom. Sa dihang mohampak ang kamatayon sa usa ka minahal, pananglitan, ang paglaom makahimog dakong kalainan sa mga namatyan. Si apostol Pablo misulat sa mga Kristohanon sa Tesalonica: “Dili namo buot nga kamo mawalay-alamag mahitungod niadtong mga nangatulog sa kamatayon; aron kamo dili managsubo ingon sa uban usab nga mga walay paglaom.” (1 Tesalonica 4:13) Samtang tinuod nga masubo ang mga Kristohanon tungod sa kamatayon, kini adunay kalainan. Sila adunay tukmang kahibalo mahitungod sa kahimtang sa mga patay ug mahitungod sa paglaom sa pagkabanhaw.—Juan 5:28, 29; Buhat 24:15.
Kini nga kahibalo nagahatag kanila ug paglaom. Ug kanang paglaoma, sa baylo, hinayhinay nga magpagaan sa ilang kasubo. Kini makatabang kanila sa paglahutay, ug labaw pa. Sa ulahi, sama sa bulak human sa bagyo, mahimong ihangad nila ang ilang mga ulo gikan sa kasubo ug makakaplag ug kalipay ug katumanan sa kinabuhi pag-usab.