“Pagbaligyag Asin” sa Mozambique

SI Francisco Coana, usa ka membro sa komite sa nasod sa Mozambique, nakagugol ug napulo ka tuig sa “mga kampo sa pag-edukar pag-usab.” Iyang giasoy ang iyang kasinatian: “Nasayod ako nga dugaydugay pa kaming makapuyo dinhi, busa akong gipangutana ang magtatan-aw sa sirkito kon makahimo ba ako sa pagpadayon ingong regular payunir. Apan unsaon nako paggugol ug igong panahon sa publikong ministeryo, sanglit halos ang tanan sa mga kampo mga Saksi ni Jehova man? Miingon ako nga moadto ako sa Milange, usa ka lungsod nga 47 kilometros ang gilay-on, aron mangitag tawo nga kasangyawan.

“Bisan tuod gidid-an kami sa awtoridad sa paggawas sa kampo, kining balaora wala ipatuman nga estrikto. Nahinumdom ako nga miadto sa kalibonan, nga nagluhod, ug nag-ampo nga makakitag paagi aron makasangyaw sa lokal nga mga tawo. Wala madugay si Jehova mitubag.

“Nakakontak akog tawo nga dunay bisikleta, ug nakigsabot ako kaniya. Misugot siya nga kon akong tikaron ang iyang duha ka akreng uma sa dili pa ang ting-ulan, iya akong bayran ug bisikleta. Busa akong gigugol ang matag buntag sa pagtikad sa iyang uma. Gipanalanginan ni Jehova kining kahikayana, sanglit sa kataposan nabatonan ko ang akong bisikleta.

“Ang sangpotanan mao nga nakahimo ako sa pag-adto sa dakong lungsod sa Milange ug nakapadayon sa akong pagpayunir sa epektibong paagi niining mabungahong natad. Sanglit ang among buluhaton gidili, kinahanglan kong maghimog paagi sa pagpailaila sa katawhan sa kamatuoran. Uban sa mga libro ug mga magasin nga gisuksok sa ilalom sa akong kamisadentro, nagdala akog asin sa bag ug namaligyag asin. Inay ibaligya kanag 5 meticais, gipresyohan ko kanag 15 meticais. (Kon barato kini kaayo, hutdon kinig palit sa mga tawo, ug wala na akoy ikabaligyang asin nga magamit sa pagsangyaw!) Ang akong mga pakigkabildo sama niini:

“‘Maayong buntag! Namaligya kog asin karon.’

“‘Tagpila man?’

“‘Kinse meticais.’

“‘Dili ko. Mahal ra kaayo na!’

“‘Tinuod bitaw, mahal ni. Apan kon nagtuo ka nga mahal kini karon, paghulat lag kadiyut kay mas momahal kini sa umaabot. Nahibalo ka ba nga gitagna kini sa Bibliya?’

“‘Wala gayod ako makabasa niana sa akong Bibliya.’

“‘Oo, anaa kana didto. Dad-a dinhi ang imong Bibliya, ipakita ko kana kanimo.’

“Pinaagi niana ang kabildohay magpadayon nga ginamit ang iyang Bibliya, busa ang akoa nagpabilin nga nasuksok sa ilalom sa akong kamisadentro. Akong ipunting ang Pinadayag kapitulo 6, bahin sa malisod nga mga kahimtang ug mga kanihit sa pagkaon. Kon makamatikod akog maayong reaksiyon, akong ipagawas Ang Kamatuoran nga Motultol sa Kinabuhing Dayon o Maayong Balita nga Maghimo Kanimong Malipayon ug sugdan ang usa ka pormal nga pagtuon sa Bibliya.

“Ang resulta mao nga nakasugod ako ug usa ka grupo sa 15 ka mga interesado sa Milange. Apan wala magdugay namatikdan kami sa mga awtoridad. Usa ka adlaw samtang nagdumala ako ug pagtuon sa Bibliya, ang mga polis kalit nga misulod sa balay ug gidakop kami. Kaming tanan, lakip sa gagmayng kabataan sa pamilya, gidala ngadto sa lokal nga bilanggoan. Human nakagugol ug usa ka bulan didto, kaming tanan gipadalag balik sa kampo.”

Kining mga hitaboa wala makapaluya sa kasibot sa atong mga igsoon. Sa kasukwahi, si Francisco ug ang iyang pamilya, uban sa libolibo nilang mga igsoon nga anaa sa mga kampo, karon nagasimba ug nagasangyaw ubos sa mga kahimtang sa kagawasan sa Mozambique.