Ang Kabos sa Israel
DILI katuyoan ni Jehova nga may bisan kinsang Israelinhon nga mag-antos sa kakabos. Ang nasod gihatagan ug panulondon nga yuta. (Numeros 34:2-12) Ang tanang Israelinhong mga pamilya, gawas sa mga Levihanon, nga midawat ug ikapulong bahin sa abot sa yuta tungod sa ilang pag-alagad sa sangtuwaryo, nakig-ambit nianang maong panulondon ug busa may kahinguhaan sa pagsuportar sa ilang kaugalingon. (Numeros 18:20, 21) Ang mga yutang gipanag-iya gipanalipdan. Ang mga balaod sa panulondon nagpasalig nga ang yuta padayong huptan sa pamilya o tribo nga maoy tag-iya niana. (Numeros 27:7-11; 36:6-9; Deuteronomio 21:15-17) Dili kini ikabaligya hangtod sa hangtod. (Levitico 25:23) Sa tuig sa Tinghugyaw ang tanang yuta nga panulondon nga nabaligya gipasig-uli sa legal nga mga tag-iya niini. (Levitico 25:13) Busa bisan kon ang usa ka tawo mag-usik-usik sa iyang kabtangan, ang panulondon dili mahimong mawagtang sa walay kataposan sa iyang mga kaliwat.
Ang matinumanong pagsunod sa kasugoan sa Diyos sa linangkob nagpugong sa kakabos taliwala sa mga Israelinhon. (Deuteronomio 15:4, 5) Apan, kon mosupak, dili nila mabatonan ang panalangin ni Jehova, ug kini motultol sa katimawa gumikan sa mga kalamidad sama sa pagsulong sa kaawayng kasundalohan ug grabeng huwaw. (Deuteronomio 28:22-25; itandi ang Maghuhukom 6:1-6; 1 Hari 17:1; 18:17, 18; Santiago 5:17, 18.) Ang mga indibiduwal, tungod sa katapolan (Proverbio 6:10, 11; 10:4; 19:15; 20:13; 24:30-34), kapalahubog, kaulitan (Proverbio 23:21), o pagkahilig sa lingawlingaw (Proverbio 21:17), makapahinabog kakabos sa ilang kaugalingon ug sa ilang mga pamilya. Unya, usab, ang wala-damhang mga kahimtang mahimong motungha nga magbanlod sa mga tawo ngadto sa kakabos. Ang kamatayon magbiya sa mga ilo ug mga balo. Ang mga aksidente ug sakit sa temporaryo o permanente mobabag sa usa ka tawo sa paghimo sa gikinahanglang buluhaton. Tungod niining maong mga katarongan si Jehova makaingon sa Israel: “Padayon nga maanaa sa yuta ang mga kabos.”—Deuteronomio 15:11.
Apan, ang Kasugoan dako ug nahimo sa pagpasayon sa mga kabos sa pagsagubang sa ilang kahimtang. Panahon sa ani sila may katungod sa pagpanghagdaw sa mga umahan, mga prutasan, ug ubasan ug, busa, dili kinahanglang mangayog tinapay o modangop sa pagpangawat. (Levitico 19:9, 10; 23:22; Deuteronomio 24:19-21) Ang kabos nga Israelinhon makahulam ug salapi nga dili pabayron ug interes, ug ang espiritu sa pagkamanggihatagon igapakita ngadto kaniya. (Exodo 22:25; Levitico 25:35-37; Deuteronomio 15:7-10) Sa pagpatubo sa iyang pondong salapi, ikabaligya niya ang iyang yuta o ibaligya ang iyang kaugalingon sa pagkaulipon, sa temporaryong kahimtang. (Levitico 25:25-28, 39-54) Aron dili malisdan ang kabos, ang Kasugoan nagtugot kanila sa pagtanyag ug dili kaayo mahalong mga halad diha sa sangtuwaryo.—Levitico 12:8; 14:21, 22; 27:8.
Ang kasugoan sa Diyos nagbaod ug parehong hustisya alang sa dato ug kabos, nga walay gipaboran sa bisan hain kanila tungod sa iyang kahimtang. (Exodo 23:3, 6; Levitico 19:15) Apan sa dihang ang nasod sa Israel nahimong dili-matinumanon, ang kabos nag-antos ug hilabihang pagdaogdaog.—Isaias 10:1, 2; Jeremias 2:34.