Mga Sensilyo nga May Ngalan sa Diyos

TAN-AWAG maayo ang platang sensilyo nga gipakita dinhi. Kini gihimo sa Alemang hari nga si Wilhelm V sa panahon sa iyang pagmando gikan sa 1627 ngadto sa 1637. Sa maong panahon, ang tungang Uropa naapil sa Katloan ka Tuig nga Gubat, usa ka panag-away tali sa mga Katoliko ug mga Protestante. Si Wilhelm V midapig sa kawsa sa mga Protestante. Aron maabot ang dako kaayong gasto sa gubat, iyang gikuha ang tanan niyang plata ug naghimo ug mga sensilyo gikan niini.

Makaiikag, ang mga larawan sa daghang sensilyo naghulagway sa adlaw nga naglibot sa ngalan sa Diyos, si Jehova, diha sa porma nga Hebreohanong Tetragrammaton. May palma usab, nga nagkahulogan ug kalig-on. Ang buot ingnon nga ang kahoy, bisag nabawog sa hangin, nagpabiling wala-mabali ubos sa proteksiyon sa Diyos. Ang Latin nga sinulat diha sa sensilyo naundan sa ngalang Jehova ug nagpahayag ug pagsalig sa iyang mapanalipdanong pag-atiman.

Imbes pangayoon ang proteksiyon sa Diyos, ang maong paggamit sa ngalan sa Diyos walay kapuslanan, kay si Jehova dili modapig sa mapintas nga mga gubat sa katawhan. Sa pagkatinuod, ang Katloan ka Tuig nga Gubat wala gayod makadawat sa pag-uyon sa Diyos. “Sumala sa ubos nga pagbanabana,” matud sa Funk & Wagnalls New Encyclopedia, “halos katunga sa katawhang Aleman ang nangamatay sa gubat. Ang di-maihap nga mga siyudad, lungsod, balangay, ug mga umahan sa Alemanya bug-os nga nagun-ob. Gibanabana nga dos-tersiya sa mga pasilidad sa industriya, agrikultura, ug komersiyo sa Alemanya ang nangadaot.”

Ang paggamit sa ngalang Jehova niini nga mga sensilyo magpahinumdom sa usa sa kasugoan nga gihatag sa Israel: “Dili mo pagagamiton ang ngalan ni Jehova nga imong Diyos sa walay kapuslanang paagi.” (Exodo 20:7) Bisan pa, kini nga mga sensilyo nagpamatuod nga ang ngalan sa Diyos, si Jehova, dugay nang nailhan sa katawhan sa Alemanya. Unsa ka dako ang pagkaila mo sa Diyos nga nagdala nianang ngalana?