Mga Babaye sa Tibuok-Kalibotan
SA DIHANG ang unang tawhanong paris mirebelde batok sa Diyos, gitagna ni Jehova ang malaglagong mga sangpotanan nga modangat kanila ug sa ilang kaliwat. Si Jehova miingon kang Eva: “Ang imong tinguha mao ang pagpangandoy sa imong bana, ug siya magabuot kanimo.” (Genesis 3:16) Ang Bibliya kanunayng nagdasig sa paghatag ug halalom nga pagtahod sa mga babaye, ug minilyong kababayen-an ang nakatagamtam ug mas malipayon, mas matagbawong mga kinabuhi tungod kay sila ug ang ilang mga banay nagapadapat sa mga prinsipyo sa Bibliya.
Sumala sa dili pa dugayng taho bahin sa tawhanong mga katungod, hinunoa, daghang ubang mga babaye sa tibuok-kalibotan ang ginapakaulawan, ginapahimuslan, ug ginapaubos. Nagkomento bahin sa taho, ang International Herald Tribune nag-ingon: “Sa makuting detalye, ang taho sa 193 ka nasod . . . naglarawan ug usa ka makasubong kahimtang sa adlaw-adlaw nga pagpihig ug pag-abuso.”
Ang pipila ka mga pananglitan: Sa tungang Aprika, ang mga babaye kinahanglang maoy mobuhat sa kadaghanang bug-at nga trabaho sa uma, ug sila makaeskuyla lamang nga un-tersiya ka subsob kay sa mga lalaki. Sa usa ka nasod didto, ang panapaw gidili sa mga babaye apan dili sa mga lalaki. Ang balaod sa laing nasod sa Aprika nagpahigawas sa bana nga magpatay sa iyang asawa kon siya makit-an sa akto nga nagapanapaw, apan ang balaod wala magpahigawas sa asawa nga magpatay sa iyang bana sa susamang mga sirkumstansiya.
Ang taho nag-ingon nga sa mga bahin sa Amerika del Sur, ang mga polis walay simpatiya sa dinagmalang mga babaye. Ug ang nagtrabaho nga mga babaye sagad modawat lamag 30 ngadto sa 40 porsiento nga mas ubos nga suweldo kay sa mga lalaki.
Sa mga bahin sa Asia, ang mga babaye maoy mga biktima sa pinugos nga pagkuha sa kaarangan nga manganak ug mga aborsiyon. Sa usa ka nasod, ingon ka daghan sa 500,000 ka pampam, nga ang kadaghanan kanila gibaligya alang niini sa mga ginikanan nga gustong makakuwarta aron makatabang sa pagpalit ug bag-ong mga balay alang sa ilang kaugalingon. Ginaatubang sa mga polis sa laing nasod ang kaylap nga “mga kamatayon tungod sa bugay”—usa ka asawa gipatay sa iyang bana o sa iyang pamilya kay ang iyang bugay kulang kay sa gilaoman.
Mahitungod kang Jesu-Kristo, ang Bibliya nagpasalig kanato: “Siya magaluwas sa kabos nga nagatuaw alang sa tabang, usab sa gisakit ug kang bisan kinsa nga walay makatabang. Siya maluoy sa timawa ug sa kabos, ug ang mga kalag sa mga kabos iyang pagaluwason. Gikan sa pagdaogdaog ug gikan sa kapintasan iyang pagalukaton ang ilang kalag, ug ang ilang dugo maoy bililhon sa iyang mga mata.” (Salmo 72:12-14) Busa kita adunay katarongan nga magmalaomon; ang mga babaye sa tibuok-kalibotan makapanglantaw ug maayong mga kahimtang nga maglungtad unya nianang panahona.