Nahinumdom Ka Ba?

Nalingaw ka ba sa pagbasa sa dili pa dugayng mga isyu sa Ang Bantayanang Torre? Kon mao, makaplagan nimong makaiikag ang paghinumdom sa mosunod:

▫ Makab-ot ba ang relihiyosong kamatuoran? Si Jesu-Kristo miingon: “Inyong mahibaloan ang kamatuoran, ug ang kamatuoran magpagawas kaninyo.” (Juan 8:32) Si Jesus wala lamang magpunting nga ang kamatuoran makab-ot kondili nagpakita nga ang pagkakaplag niini gikinahanglan sa atong pagsimba sa Diyos. Gisultihan niya ang usa ka Samaritana: “Ang matuod nga mga magsisimba mosimba sa Amahan pinaagi sa espiritu ug kamatuoran.” (Juan 4:23)​—4/15, panid 5.

▫ Kinsa si Robert Estienne, ug sa unsang paagi nagbilin siya sa iyang marka? Si Robert Estienne maoy usa ka tig-imprinta nga nabuhi sa ika-16 nga siglo. Iyang gideboto ang iyang kinabuhi sa pagpatik sa Balaang Kasulatan ug naningkamot sa pagtuki sa mga pulong sa Bibliya sa orihinal nga pagkasulat. Ang iyang sistema sa pagbahin sa teksto sa Bibliya ngadto sa numeradong mga bersikulo mao ang sistema nga mao nay kasagarang gigamit karon.​—4/15, mga panid 10, 14.

▫ Sa unsang paagi makabenepisyo kita gikan sa pagbasa sa Bibliya sa adlaw-adlaw? Ang Kasulatan kanunay may bag-ong kahulogan alang kanato, ug ang mga tagna mahitungod sa kataposang mga adlaw mahimong labi pang makahuloganon sa kahayag sa atong nakit-an, nabatian, ug nasinati sa personal. Samtang mapadako ang atong kaugalingong kasinatian sa kinabuhi ug masagubang nato ang mga suliran, kita makapabili pa nga mas bug-os sa tambag sa Bibliya. (Proverbio 4:18)​—5/1, panid 15.

▫ Sa unsang paagi mahinumdoman ang mga teksto sa Bibliya? Samtang gibasa nimo ang Bibliya, timan-i ang piniling mga teksto nga ilabinang buot nimong mahinumdoman, o isulat kini diha sa mga kard ug ibutang kini sa dapit diin makita nimo kini matag adlaw. Samtang naningkamot ka sa pagmemorya sa mga bersikulo, palandonga kini ug gamita kini. Ayawg sulayi ang pagmemorya ug daghan kaayo sa usa ka panahon, tingali usa o duha lamang matag semana.​—5/1, panid 16, 17.

▫ Unsang impormasyon ang narekord sa Ebanghelyo ni Lucas nga nadugang diha sa gitagana sa mga magsusulat sa ubang Ebanghelyo? Samtang ang kadaghanang girekord ni Lucas pareho nianang sa asoy ni Mateo, ang 59 porsiento maoy lahi. Si Lucas nagrekord ug unom ka milagro nga iya lamang sa iyang basahon, ug nagtaho siya ug labaw sa duha ka beses nianang gidaghanona sa mga ilustrasyon ni Jesus nga wala hisgoti sa ubang mga magsusulat sa Ebanghelyo.​—5/15, panid 12.

▫ Unsang talagsaong mga kidlap sa kahayag sa kamatuoran ang gibutyag sa 1935? Niadtong tuiga nasabtan sa katawhan ni Jehova nga ang dakong panon nga gihisgotan sa Pinadayag 7:9, 14 nagpunting, dili sa ikaduhang langitnong matang, kondili alang niadtong kansang mga paglaom maoy yutan-on. (Juan 10:16)​—5/15, panid 20.

▫ Sa unsang praktikal nga mga paagi makalipay kita sa mga namatyan? Pamati. Ihatag ang pasalig. Magmaanaa. Manguna kon gikinahanglan. Pagsulat ug makapahupay nga sulat o kard. Pag-ampo uban kanila. (Santiago 5:16) Padayong tabangan sila.​—6/1, mga panid 13, 14.

▫ Unsay ikatabang sa espirituwal nga mga igsoong lalaki ug babaye niadtong nagpuyo sa mga pamilyang nabahin sa relihiyon aron makalahutay? Sa kanunay pagsultig madasigon, positibo, ug makapahupay nga mga pulong kanila. (1 Tesalonica 5:14) Kining buhata samag pangpalagsik sa ilang hunahuna ug lawas. Dihang praktikal ug angayan, ilakip sila sa imong teokratikanhon ug sosyal nga mga kalihokan. Ilakip sila sa imong mga pag-ampo. (Roma 1:9; Efeso 1:16)​—6/1, panid 29.

▫ Unsang mga ganti ang maangkon gikan sa pagpailob samtang nakigbahin sa ministeryo sa kanataran? Ang pagpailob makatabang sa magmamantala sa Gingharian sa paglahutay sa bisan unsang kawalay-pagtagad o pagsupak. Imbes makiglalis sa nasukong mga tagbalay, ang mapailobong mga ministro makahimo sa paghatag ug malumong tubag o mobiyang malinawon, sa ingon mahuptan ang kalinaw ug kalipay. (Mateo 10:12, 13) Dugang pa, ang mga karnerohon madani sa mensahe sa Gingharian.​—6/15, panid 9.

▫ Nganong ang pagkahibalo sa kamatuoran sa Bibliya hinungdanon kaayo? Ang pagkahibalo sa kamatuoran mohatag kanatog kagawasan gikan sa kabakakan, sa sayop nga mga pagtuo, ug mga patuotuo. Kon kita magkinabuhi sumala niana, ang kamatuoran magpalig-on kanato sa paglahutay sa mga kalisod ug magdasig kanato nga may paglaom nga magpaarang kanato sa pagbarog sa pagsulay.​—7/1, panid 8.

▫ Unsang pangunang kaakohan ang gikuha sa dinihogang Kristohanong kongregasyon gikan sa kinaiyanhong Israel? Ang pribilehiyo sa pagpamatuod sa pagkadako ni Jehova taliwala sa mga nasod. (Isaias 43:21; 1 Pedro 2:9)​—7/1, panid 19.

▫ Unsay ipasabot sa mga pulong ni apostol Pablo nga ang bana angayng ‘magpasidungog’ sa iyang asawa? (1 Pedro 3:7) Ang bana nga nagpasidungog sa iyang asawa dili magpakaulaw o magpaubos kaniya. Hinunoa, iyang ipasundayag pinaagi sa iyang mga pulong ug sa iyang mga buhat​—sa pribado ug sa publiko​—nga siya nagpabili kaniya. (Proverbio 31:10-31)​—7/15, panid 19.

▫ Nganong ikaingon nga mahigugmaon ang pagpalagpot sa dili mahinulsolong mamumuhat ug daotan gikan sa Kristohanong kongregasyon? Ang pagpalagpot maoy usa ka ekspresyon sa gugma alang kang Jehova ug sa iyang mga dalan. (Salmo 97:10) Kini nagpakitag gugma alang niadtong nagpadayon sa matarong nga dalan tungod kay kini magkuha gikan sa ilang taliwala sa usa ka daotang impluwensiya diha kanila; kini magpanalipod usab sa kahinlo sa kongregasyon. (1 Corinto 5:1-13)​—7/15, panid 25.

▫ Sa unsang paagi “ang kasaligan ug mabuot nga ulipon,” nga giisgotan ni Jesus sa Mateo 24:45-47, mailhan karon? Sila mailhan ilabina pinaagi sa buluhatong ginabuhat nila sa pagtaganag pinasukad-sa-Bibliya nga mga publikasyon, sa pagtudlo ug pagsangyaw sa “maayong balita sa gingharian,” ug pinaagi sa ilang suod nga pagsunod sa Pulong sa Diyos, ang Bibliya. (Mateo 24:14; 28:19, 20)​—8/1, panid 16.