Gihukman ang Kaso Batok sa mga Saksi ni Jehova

HUMAN sa sublisubli nga pag-oktaba, ang Korte sa Apelasyon sa Tesalonica, Gresya, sa kataposan nagtigom niadtong Hunyo 8, 1995, aron husayon ang kaso batok sa upat ka babayeng mga Saksi ni Jehova. Ang demanda nga gipasaka batok kanila? Pagpangabig, nga gidili sa Gregong balaod sulod na sa kapin sa lima ka dekada.

Ugaling, sa panahong nagtigom ang husgado, ang pangunang testigo sa nagdemanda​—ang pari nga naghulhog sa kaso batok sa upat ka babaye​—patay na. Laing pari ang misulay sa pagtestigo puli kaniya, apan wala dawata sa korte ang iyang pangatarongan. Busa, dili ikahibulong nga ang bista miabot lamang ug 15 minutos! Gisukitsukit sa huwes ang ubang mga testigo sa nagdemanda ug nakakaplag nga ang mga gidemanda dili sad-an sa pagbuhat sa supak-sa-balaod nga pagpangabig. Kining desisyona nagpaila nga ang mga korte sa Gresya andam sa pagtahod ug pagsunod sa desisyon nga nakab-ot niadtong 1993 sa Korte sa Tawhanong mga Katungod sa Uropa.

Ilabinang makaiikag ang pagkakita sa tulo ka babaye nga mitestigo alang sa nagdemanda nga miduol sa mga gidemandang Saksi, nga kinasingkasing nga nagpahalipay kanila. “Pasayloa kami sa tanang butang nga nahitabo,” matod sa usa kanila. Siya midugang: “Dili kini among sayop. Gipugos kami sa pari sa pagtestigo batok kaninyo. Karon nga siya patay na, buot namo nga duawon ninyo kami sa among baryo ug sa among mga balay.”

Busa, sa makausa pa gihatagan ni Jehova ug kahibulongang kadaogan ang iyang katawhan sa Gresya. Ang mga balaod sa pagpangabig gipasa sa Gresya niadtong 1938 ug 1939. Niadtong 1993 ang Korte sa Tawhanong mga Katungod sa Uropa nagbaod nga sayop ang paggamit niining balaora sa paglutos sa mga Saksi ni Jehova.​—Tan-awa Ang Bantayanang Torre, Septiyembre 1, 1993, mga panid 27-31.