Ang Pagtuo Nagpalihok Kaniya
SA DIHANG gisugo ni Jehova si Moises sa pagpagawas sa nasod sa Israel gikan sa pagkaulipon sa Ehipto, sa sinugdan si Moises mibalibad, nga nag-ingon: “Pasayloa ako, Jehova, apan ako dili larinong mosulti, bisan sukad kaniadto ni sa una pa niana bisan sukad nga ikaw misulti sa imong ulipon, kay ako hinay nga mamulong ug yungit ug dila.” (Exodo 4:10) Oo, si Moises wala mobating kuwalipikado alang sa maong bug-at nga asaynment.
Susama karong adlawa, daghang alagad ni Jehova ang mobati usahay nga nakulangan sa pagtuman sa mga kaakohan nga giasayn kanila. Pananglitan, usa ka Kristohanong magtatan-aw nga ginganlag Theodore miasoy: “Sa tanang butang nga gihangyo kanako ni Jehova nga buhaton, ang pagsangyaw sa kanataran mao ang kinalisoran. Sa bata pa ako, moduol dayon ako sa pultahan, magpasangil nga mopatingog sa timri, ug hilom nga molakaw, nga nanghinaot nga walay makadungog o makakita kanako. Sa pagkahamtong nako, mihunong ako sa pagbuhat niadto, apan ang ideya nga mamalay-balay naghimo kanakong masakiton sa pisikal. Bisan hangtod karong adlawa, ako mobatig kasukaon sa dili pa mosangyaw, apan mosangyaw gihapon ko.”
Unsay nakapaarang kang Moises ug sa modernong-adlawng mga Saksi sama kang Theodore nga makasagubang sa maong mga kahadlok? Ang Bibliya mitubag: “Tungod sa pagtuo siya [Moises] mibiya sa Ehipto, . . . kay siya nagpabilin mang lig-on nga daw sa nakita ang Usa nga dili makita.”—Hebreohanon 11:27.
Sa pagkatinuod, pinaagi sa pagbaton ug pagtuo kang Jehova, si Moises nakabuntog sa iyang mga pagbati nga nakulangan ug nagtuman sa gitudlo kaniyang mga katungdanan ingong maghuhukom, propeta, nasodnong lider, tigpataliwala sa pakigtugon sa Kasugoan, pangulo, historyano, ug magsusulat sa Bibliya.
Sa samang paagi, sa dihang kita adunay pagtuo sama kang Moises, kita molakaw nga daw sa “nakita ang Usa nga dili makita.” Ang maong pagtuo nagdasig sa pagkamaisogon, nga nakapaarang kanato sa pag-abaga sa atong Kristohanong mga responsabilidad—bisan sa dihang kita tingali mobating nakulangan.