Kanhing Huwes Nangayog Pasaylo—Human sa 45 ka Tuig

SA USA ka sala sa korte sa Berlin, sa Agosto 1995, usa ka kanhing huwes sa Korte Suprema mipahayag ngadto sa usa sa mga Saksi ni Jehova sa iyang pagbasol sa sala nga iyang nahimo 45 ka tuig kanhi.

Sa Oktubre 1950, ang Korte Suprema sa German Democratic Republic (GDR) mipahayag sa siyam ka Saksi ni Jehova nga sad-an sa batok-estado nga kasamok ug pangespiya. Duha ang gihukman sa tibuok kinabuhing pagkabilanggo, ug ang laing pito​—lakip ang 22-anyos nga si Lothar Hörnig, ikaupat nga sinumbong gikan sa tuo diha sa letrato​—gihukman sa dugayng pagkabilanggo.

Kuwarenta ka tuig sa ulahi, ang GDR nahimong bahin sa Pederal nga Republika sa Alemanya. Ang mga opisyal sukad niadto nagsusi sa pipila ka inhustisya nga nahimo sa kanhing GDR ug naningkamot sa pagpahamtang ug hustisya niadtong maoy responsable. Usa sa maong inhustisya mao ang husay sa Korte Suprema sa mga Saksi niadtong 1950.

Si A. T., karon 80 anyos, maoy usa sa tulo ka huwes nga mipahamtang sa paghukom sa dihang ang siyam ka Saksi gihusay. Karon gisumbong nga nagtuis sa hustisya, siya miatubang sa Rehiyonal nga Korte sa Berlin sa pagsaysay sa iyang hukom.

Sa iyang pahayag ngadto sa korte, ang kanhing huwes miadmitir nga siya miboto alang sa hukom nga sad-an 45 ka tuig kanhi, bisan tuod nga siya miuyon sa dili kaayo grabeng mga hukom. Apan ang kaso nagpahunahuna kaniya pag-usab. Ngano? Ang mga Saksi ni Jehova gilutos sa mga Nazi panahon sa ikaduhang gubat sa kalibotan tungod kay sila midumili sa pagpaluyo kang Hitler. Human sa gubat ang mga Saksi gilutos na usab, niining panahona sa Komunistang rehimen. Kini nagpahinabo sa huwes nga “naguol pag-ayo.”

Giingnan ni Lothar Hörnig ang korte nga siya gibartolina sulod sa lima ka tuig ug tunga ug wala pagawsa sa bilanggoan sa Brandenburg hangtod sa 1959. Sa pagkadungog sa pahayag ni Hörnig, ang kanhing huwes mihilak. “Gikasubo ko kaayo,” siya mibakho. “Palihog pasayloa ako.” Gidawat ni Hörnig ang pagpangayog pasaylo.​—Itandi ang Lucas 23:34.

[Picture Credit Line sa panid 32]

Neue Berliner Illustrierte